Usı jıldıń 2-marttaǵı Húkimettiń 88-sanlı qararı menen sırt el joqarı bilimlendiriw shólkemlerinde oqıw tilegindegi jaslar hám pedagog xızmetkerlerge tálim kreditin ajıratıw tártibine baylanıslı reje tastıyıqlandı.
Reje Tálim kreditin qarjılandırıw qorı esabınan jeńilletilgen tálim kreditin ajıratıw hám olardı qaytarıw tártibin belgileydi.
Rejege bola, tálim krediti tómendegi talaplarǵa juwap beretuǵın jaslar (30 jastan aspaǵan, sonıń ishinde, 30 jasta bolǵan) hám pedagoglarǵa ajıratıladı:
– QS (Quacquarelli Symonds) yamasa THE (The Times Higher Education) boyınsha TOP-300 likke kirgen sırt el joqarı bilimlendiriw shólkemlerine oqıwǵa qabıl etilgen;
– Ózbekstan puqaraları bolǵan.
Kredit olardıń bakalavriat hám magistratura baǵdarlamalarında bilim alıwı ushın ajıratıladı.
Kredit 1 oqıw jılı ushın 20 mıń AQSh dollarına shekemgi muǵdardaǵı ekvivalentte milliy valyutada ajıratıladı.
Kredittiń tiykarǵı qarızı studenttiń rásmiy oqıw múddeti juwmaqlanǵannan soń 7-aydan baslap 7 jıl dawamında qaytarıladı.
Kredit alıwshı bankke múrájat etiwde tómendegi hújjetlerdi usınadı:
arza;
– shaxstı tastıyıqlawshı hújjetlerdiń nusqası;
– mirátnama-xat (1-kurslar ushın);
– akademiyalıq ózlestiriw nátiyjeleri (2-kurstan baslap);
– tólemli-kontrakt tiykarında oqıw boyınsha shártnama hám joqarı bilimlendiriw shólkeminiń bank rekvizitleri kórsetilgen invoys;
– birgeliktegi qarız alıwshılardıń sońǵı 12 aylıq dáramatları boyınsha maǵlıwmat;
– miynet dáptershesinen kóshirme (30 jastan asqan pedagoglar ushın).
Tálim krediti stavkası Oraylıq banktiń tiykarǵı stavkası muǵdarında belgilenedi,- dep málimleme beredi xabar.uz saytı.

Qaraqalpaqstan xabar agentligi