Shańaraq insan ushın eń muqaddes dárgay. Kimniń shańaraǵı tınısh-tatıw bolsa, ol jámiyette óz ornın tabadı, sol shańaraqta ósken perzentler elge, adamlarǵa payda keltiretuǵın insanlar bolıp kamalǵa keledi.
Tilekke qarsı, búgingi kúnde jámiyetimizde ajırasqan shańaraqlar, ajırasıp perzentlerin tiri jetim etip atırǵan yamasa qanday da bir sebepler menen perzentlerin óz-ara talasıp atırǵan ata-analar da joq emes.
Májbúriy orınlaw byurosı Qaraqalpaqstan Respublikası basqarması, onıń qalalıq, rayonlıq bólimleri tárepinen mine usınday jaǵdaylar boyınsha orınlaw hújjetleriniń orınlanıwın támiyinlew baǵdarında zárúr jumıslar alıp barılmaqta.
Beruniy rayonında jasawshı puqara D.Sh. shańaraqlıq kelispewshilik sebepli ómirlik joldası A.S.nıń úyinen ketiwge májbúr bolǵan. Biraq erjetpegen perzentin alıp kete almaǵanınan keyin, ol sudqa múrájat etken.
Byuronıń Beruniy rayonlıq bólimine puqaralıq isleri boyınsha Beruniy rayonlar aralıq sudınıń juwapker A.S.dan perzentin dawager D.Sh., yaǵnıy balalardıń anası qaramaǵına alıp beriw boyınsha orınlaw hújjeti kelip túsken.
Bólim xızmetkerleri tárepinen usı orınlaw hújjetiniń orınlanıwın támiyinlew maqsetinde alıp barılǵan orınlaw háreketleri dawamında juwapkerge jas óspirim balanı anasına ıqtıyarlı túrde tapsırıw haqqında eskertiw xatı jiberilgen. Biraq áke perzentin anasına beriwden bas tartqan. Soǵan bola, mámleketlik orınlawshılar tárepinen tiyisli uyımlardıń wákilleri hám qalıslardıń qatnasıwında jas óspirim baladı anasınıń tárbiyasına alıp beriliwi támiyinlendi.
Jámiyette nızam ústinligin, shańaraq bekkemligin támiyinlew áhmiyetli wazıypa. Usı wazıypanı ámelge asırıwǵa hámme birdey juwapker hám minnetli ekenin hasla umıtpawımız kerek.

Qaraqalpaqstan xabar agentligi