ÓzA “Sırtqı diplomatiya” rubrikası arqalı mámleketimizdiń sırt ellerdegi elshixanaları hám konsullıq oraylarınıń jumısı menen jaqınnan tanıstırıw, elshilerimiz tárepinen ekonomikalıq diplomatiyanı rawajlandırıw jolında alıp barılıp atırǵan jumıslardı tallawda dawam etedi.
S5+1 formatı sheńberinde ilimiy birge islesiw forumı ótkerildi
Germaniya. Ózbekstan elshisi Dilshod Ahatov Germaniyanıń Xalle qalasında jaylasqan Leopoldina – Germaniya Milliy ilimler akademiyası rezidenciyasında Oraylıq Aziyaǵa baǵıshlanǵan Joqarı bilimlendiriw hám ilim forumında qatnastı. Ilaj S5+1 formatı sheńberinde GFR hám Oraylıq Aziya mámleketleriniń strategiyalıq sherikligin bekkemlewge qaratıldı.
Ullı Britaniya. Ózbekstannıń Ullı Britaniyadaǵı elshixanasınıń baslaması menen belgili ózbek kórkem óner ǵayratkeri, maqam sheberi Ilyas Arabov London qalasındaǵı SOAS universiteti hám Shıǵıstanıw hám Afrika úyreniw mektebinde koncert baǵdarlamasın usındı. Bul mádeniy ilaj sheńberinde milliy kórkem ónerimiz úlgileri atqarıldı, ózbek mádeniy miyrası sırt elli tıńlawshılarǵa keń kólemde kórsetildi.
Ispaniya. Madrid qalasında eki mámleket mámleketlik strukturaları hám isbilermen toparlarınıń wákillerin birlestirgen Ózbekstan – Ispaniya biznes-forumı bolıp ótti. Ilajda respublikamızdıń investiciyalıq potencialı, elimizde ámelge asırılıp atırǵan iri regionallıq joybarlar, sonday-aq, Ispaniya kompaniyaları menen energetika, agrosanaat kompleksi, suw infrastrukturası hám turaqlı rawajlanıw tarawlarındaǵı sheriklik perspektivası dodalandı. Forum juwmaǵı boyınsha 4 hújjetke qol qoyıldı, B2B ushırasıwları ótkerildi.
Franciya. Ózbekstannıń Parijdegi elshixanası tárepinen Franciyada jumısqa jaylastırıw boyınsha rekruting agentliginiń wákilleri Nataliya Yun hám Fabris Miyar menen nátiyjeli ushırasıw ótkerildi. Sóylesiw dawamında bul mámlekette máwsimlik bántlik ushın Ózbekstannan miynet migrantların tartıw perspektivası dodalandı. Sonday-aq, kadrlardı sistemalı tańlaw, miynet standartına qatań ámel etiw hám xızmetkerler ushın múnásip miynet sharayatın jaratıw máselelerine ayrıqsha itibar qaratıldı.
Yaponiya. Ózbekstan Respublikasınıń Shıǵıs elindegi elshixanasında Yaponiya Sırtqı sawda shólkemi (JETRO) hám “Fujikura Kasei Co., Ltd.” kompaniyasınıń wákilleri menen ushırasıw shólkemlestirildi. Sóylesiw waqtında investiciyalıq joybarlar, óz-ara birge islesiw hám eksport imkaniyatın keńeytiw temaları kóterildi.
Egipet. Kair qalasında Imam Moturidiy xalıqaralıq ilimiy-izertlew orayınıń delegaciyası Al-Azhar kompleksine bardı. Májilis sheńberinde delegaciya aǵzaları rásmiy ushırasıwlarda qatnastı. Sapar dawamında Sırt elli studentler bilimlendiriwin rawajlandırıw orayınıń basshısı doktor Nahla As-Saidiy menen sóylesiw ótkerildi. Ushırasıwda ilimiy birge islesiwdi jáne de bekkemlew, birgeliktegi joybarlardı ámelge asırıw hám islam dininiń múnásiplik hám keńpeyillik ideyaların keńnen úgit-násiyatlaw zárúr ekenligi atap ótildi. Sonday-aq, Egipette bilim alıp atırǵan studentlerimizdi qollap-quwatlaw boyınsha usınıslar alǵa qoyıldı.
Franciya. Franciyanıń Ózbekstandaǵı Ayrıqsha hám tolıq huqıqlı elshisi Valid Fuke menen ushırasıw bolıp ótti. Sóylesiw dawamında eki tárepleme birge islesiw, atap aytqanda kosmos tarawın rawajlandırıw perspektivası dodalandı. “Ózbekkosmos” direktorı Sh.Qodirov birge islesiwshi tárepke “Novaspace”, “Kosmoslıq izertlewler hám texnologiyalar-2030” strategiyası hám “Geo Ferma” joybarı boyınsha ámelge asırılıp atırǵan jumıslar haqqında maǵlıwmat berdi. Sonday-aq, CNES penen sheriklik imkaniyatı da kórip shıǵıldı.
Polsha. Elshixana delegaciyası Ullı Polsha voevodalıǵına saparı sheńberinde bir qatar nátiyjeli ushırasıwlar ótkerdi. Marshal orınbasarı Yacek Boguslavski qatnasıwında Ándijan hám Nawayı wálayatları menen aymaqlararalıq birge islesiw máselesi dodalandı. Polsha Investiciyalar hám sawda agentligi menen birgelikte Poznan qalası meriyasında “Ózbekstanda biznes júrgiziw imkaniyatı” konferenciyası ótkerildi hám bir qatar ámeliy kelisimlerge erisildi. Sonday-aq, “Biernacki” gósh islep shıǵarıw kárxanasınıń basshısı Marchin Kulak penen sóylesiw alıp barıldı.
Vengriya. Ózbekstannıń Budapeshttegi arnawlı wákili Lyuteran teologiya universitetiniń rektorı Andrash Korani menen sóylesiw ótkerdi. Tárepler 2026-jıl 5-mart kúni Samarqandta bolıp ótetuǵın III Ózbekstan-Vengriya rektorlar forumına universitet delegaciyasınıń saparı hám ulıwma ilajǵa tayarlıq temasın dodaladı. Sonday-aq, eki tárepleme bilimlendiriw hám ilimiy joybarlardı rawajlandırıw perspektivası kórip shıǵıldı. Rektor elimizdegi diniy bilimlendiriw mákemeleri menen birge islesiw, studentler almasıwı hám birgeliktegi ilimiy izertlewlerge qızıǵıwshılıq bildirdi. Sóylesiwde dinleraralıq tatıwlıq, diniy keńpeyillik hám mádeniy miyrastıń áhmiyetine ayrıqsha itibar qaratıldı.

Fardona YaXShIBOEVA, ÓzA