Indoneziyanıń abıraylı basılımlarınan biri “Kalimantan Post” gazetasınıń xabarshısı Imam Moturidiy xalıqaralıq ilimiy-izertlew orayı direktorınıń orınbasarı Shahzod Islomov penen Ózbekstanda sońǵı jıllarda diniy-aǵartıwshılıq tarawında ámelge asırılıp atırǵan reformalarǵa baǵıshlanǵan arnawlı sáwbet ótkerdi.
Intervyude atap ótiliwinshe, sońǵı jılları Ózbekstanda bolıp atırǵan jańalanıw processleri, alıp barılıp atırǵan aǵartıwshılıq reformalar mámlekettiń zıyarat turizmi potencialın keskin arttırıwǵa xızmet etti.
Ásirese, Samarqandta Imam Buxariy kompleksi, Tashkentte Ózbekstandaǵı Islam civilizaciyası orayınıń imaratı paydalanıwǵa tapsırılıwı tek ǵana musılman ellerinen emes, al pútkil dúnyadan turistlerdi ózine tartadı.
Sonıń ishinde, qánigelerdiń pikirinshe, 2026-jılı Samarqandtaǵı Imam Buxariy kompleksin zıyarat etiw ushın 100 mıń indoneziyalı turisttiń Ózbekstanǵa keliwi rejelestirilmekte. Elektron viza statistikası da Indoneziyadan múrájatlar sanınıń izbe-iz artıp baratırǵanın kórsetedi.
Sonday-aq, indoneziyalılardıń Imam Termiziy, Imam Moturidiy hám Bahauddin Naqshband komplekslerin zıyarat etiw tilegi artqan.
Intervyude atap ótiliwinshe, eki mámleket arasındaǵı baylanıslar tek ǵana turizm tarawında emes, al ilimiy-izertlew baǵdarında da jedel rawajlanbaqta.
Indoneziyalı ilimpaz hám izertlewshilerde Imam Moturidiy xalıqaralıq ilimiy-izertlew orayı járiyalaǵan xalıqaralıq stipendiya baǵdarlaması qızıǵıwshılıq oyatpaqta. Akademiyalıq almasıw baǵdarlamaları, xalıqaralıq konferenciya hám seminarlar eki mámleket arasındaǵı tariyxıy tamırlarǵa iye intellektuallıq baylanıslardı jańa basqıshqa alıp shıǵadı.
Bulardıń barlıǵı elimizdegi aǵartıwshılıq reformalardıń xalıqaralıq kólemdegi jáne bir joqarı tán alınıwı bolıp esaplanadı.

N.Usmonova, ÓzA