Ádil sudlaw akademiyası tárepinen BMShtıń Balalar qorı (YuNISEF) menen birgelikte sudyalar ushın qánigelik arttırıw kursları shólkemlestirildi.
Onda Akademiya rektorı Sherzod Abduqodirov balalar huqıqların isenimli qorǵaw máselesi mámleketlik siyasattıń tiykarǵı baǵdarlarınan biri ekenin atap ótip, sudyalar moynındaǵı juwapkershilik hám professional qatnastıń áhmiyetli táreplerine ayrıqsha toqtap ótti.
Bul xalıqaralıq formattaǵı oqıw kurslarında juwapker shólkemlerdiń wákilleri hám respublika boyınsha 30 ǵa shamalas jınayat isleri boyınsha sudlar sudyaları belsene qatnastı.
Eki kún dawam etken shınıǵıwlar sheńberinde qatnasıwshılar balalardı zorlıqtan qorǵaw boyınsha milliy hám xalıqaralıq standartlardı úyrendi.
Jábirleniwshi balalar menen sóylesiwdiń psixologiyalıq tárepleri, sud procesinde balalar ushın qolaylı hám qáwipsiz ortalıq jaratıw, xalıqaralıq tájiriybe hám ámeliy qatnaslar boyınsha bilim hám kónlikpelerin arttırdı.
Oqıwlar xalıqaralıq ekspert hám milliy qánigelerdiń qatnasıwında interaktiv hám ámeliy formatta ótkerildi.
Bul ilaj sud ámeliyatında balalardıń máplerin támiyinlew, sonday-aq, xalıqaralıq birge islesiw hám tájiriybe almasıwdı bunnan bılay da bekkemlewge xızmet etedi.

N.Abduraimova, ÓzA