Berdaq atındaǵı Qaraqalpaq mámleketlik akademiyalıq muzıkalı teatrında Ózbekstan hám Qaraqalpaqstan kórkem óner ǵayratkeri, Berdaq atındaǵı mámleketlik sıylıqtıń laureatı, kompozitor, dirijyor, xormeyster, professor Qurbanbay Zaretdinovtıń tuwılǵanınıń 75 jıllıǵına baǵıshlanǵan keshe bolıp ótti.
Ilajda Qaraqalpaqstan Respublikası Joqarǵı Keńesiniń komitet baslıǵı M.Atamuratov, Qaraqalpaqstan Respublikası Ministrler Keńesiniń sekretariat baslıǵı Z.Ómirbekov, “Nuraniy” qorınıń Qaraqalpaqstan Respublikası bólimi baslıǵı T.Abdijabbarov, Qaraqalpaqstan Respublikası Mádeniyat ministri B.Temirbaevlar shıǵıp sóylep, Qurbanbay Zaretdinovtıń respublikamızdıń mádeniyatın, kórkem ónerin rawajlandırıwdaǵı derlik 60 jıllıq jemisli miynetine toqtap ótti.
Óziniń miynet jolın 1967-jılı Berdaq atındaǵı Qaraqalpaq mámleketlik muzıkalı teatrı xor artisti sıpatında basladı. 1970-1975-jılları M.Ashrafiy atındaǵı Tashkent mámleketlik konservatoriyasında bilim aladı. Konservatoriyanı tamamlap kelgennen soń 1975-1981-jılları J.Shamuratov atındaǵı Nókis mámleketlik kórkem óner bilim jurtı oqıtıwshısı, direktordıń orınbasarı, 1981-1989-jılları Qaraqalpaq mámleketlik filarmoniyası orkestr dirijyorı, 1984-1985-jılları Sankt-Peterburg Kishi opera hám balet teatrı dirijyor stajyorı, 1989-jıldan berli Berdaq atındaǵı Qaraqalpaq mámleketlik muzıkalı teatrınıń dirijyorı, bas xormeyster, bas dirijyorı lawazımlarında islep kelmekte. Qurbanbay Zaretdinov barlıq kúsh-quwatın, sanalı ómirin qaraqalpaq kórkem ónerin rawajlandırıwǵa baǵıshlaǵan sheber shólkemlestiriwshi, uqıplı basshı. Ol qaysı lawazımda islemesin, miynet súygishligi, jumısqa bolǵan talapshańlıǵı hám ádil basqarıwı menen húrmetke iye.
Ol kompozitor sıpatında lirikalıq hám tariyxıy temalarda qosıqlar hám orkestr ushın muzıkalar dóretti.
“Tumaris”, “Dayı qız”, “Báhár”, “Búlbil”, “Ustaz”, “Begjap tragediyası”, “Nazlımxan sulıw” hám basqa da shıǵarmalardıń avtorı.
“Ójetler”, “Yor visoli” muzıkalı draması, “Ájiniyaz” operasında, “Ayjamal” baletinde, “Maysaranıń hiylesi”, “Aleko”, “Berdaq”, “Edige”, “Ǵárip ashıq” muzıkalı spektaklleriniń, “Tumaris”, “Qırıq qız”, “Edige”, “Aralım meniń” operaları, “Ziywar” muzıkalı draması, “Nazlımxan sulıw” baleti hám teatrda saxnalastırǵan basqa da muzıkalı spektakllerde sheberlik penen dirijyorlıq etip, tamashagóylerdi tań qaldırdı. O.Abdiraxmanovtıń, K.Raxmanovtıń spektakllerine muzıka jazdı.
Ol Qazaqstan, Daǵıstan, Bashqurstan Respublikalarında, Tashkent qalasında, Xorezm wálayatında ótkerilgen mádeniyat-doslıq kúnleriniń, festivallardıń, Ózbekstan Respublikası Ǵárezsizlik, Nawrız ulıwma xalıqlıq bayramlarınıń, iri mádeniy saltanatlı bayram keshelerinde, úlken teatrlastırılǵan koncertlerdiń, gastrol saparlarınıń belsendi qatnasıwshısı.
2008-jılı Ashxabad qalasında ótkerilgen muzıka festivalında qatnastı.
2013-jılı Tashkent qalasında teatr jámááti menen gastrol saparında bolıp “Alpamıs” spektakliniń dirijyorı, 2013-jılı teatrda saxnalastırılǵan “Tumaris” operası hám 2015-jılı “Qırıqqız” baletiniń avtorı.
Qaraqalpaqstan Respublikası Mádeniyat hám sport isleri ministrliginiń 2015-jıl juwmaǵı boyınsha “E’tirof” tańlawınıń “Jıldıń eń jaqsı kompozitorı” nominaciyası jeńimpazı. 2016-jılı Tashkent qalası Á.Nawayı atındaǵı Ózbekstan mámleketlik úlken teatrında “Ájiniyaz”, “Tumaris” operaları, “Assalam-Tashkent aqshamı” simfoniyalıq orkestri koncerti menen qatnasıp tamashagóyler hám qánigelerdiń alǵısına eristi.
2023-jıl “Edige” operası, 2024-jıl “Ziywar” muzıkalı draması, “Aralım meniń” operasınıń, 2025-jıl “Nazlımxan sulıw” baletiniń avtorı hám dirijyorı. Onıń qaraqalpaq kórkem ónerine hám milliy mádeniyatımızdıń rawajlanıwına qosqan úlesi húkimetimiz tárepinen waqtında joqarı bahalandı. 2000-jılı “Ózbekstan Respublikası kórkem óner ǵayratkeri” húrmetli ataǵı menen sıylıqlandı.
Keshede belgili kórkem óner sheberleriniń eske túsiriwleri, biytákirar talant iyesiniń shıǵarmalarınan ibarat koncert baǵdarlaması qoyıp berildi. Qaraqalpaqstan Respublikası Joqarǵı Keńesi hám Ministrler Keńesi tárepinen tayarlanǵan estelik sawǵaları, Ózbekstan Respublikası Mádeniyat ministrliginiń “Mádeniyat hám kórkem óner pidayısı” kókirek belgisi tapsırıldı.

Qaraqalpaqstan xabar agentligi