Qarın toyıp awqatlanǵannan keyin kofe ishiw as sińiriw procesine járdem bere me? London patshalıq kolledjiniń dietologı Doktor Emili Limingtiń pikirinshe, ayırım adamlar ushın bul haqıyqatında da paydalı bolıwı múmkin, biraq hámmege birdey jarasa bermeydi.
Qánigeniń atap ótiwinshe, kofein ishektiń jumısın qollap-quwatlaydı hám bulshıq et qısqarıwların kúsheytedi. Bul kópshilikte azıq-awqattıń as sińiriw sisteması arqalı “normal tezlikte” háreketleniwine járdem beredi. Eger as sińiriw procesi biraz tómenlep atırǵan bolsa, bul unamlı tásir kórsetiwi múmkin. Biraq nerv ishek sindromi sıyaqlı mashqalası bar adamlarda keri tásir berip, processti hádden tıs tezlestirip hám qolaysızlıq tuwdırıw itimalı bar.
Kofeniń tásiri tek ǵana ishek háreketi menen sheklenbeydi. Turaqlı túrde kofe ishiw ulıwma ishek salamatlıǵı menen de baylanıstırılmaqta. Izertlewler sonı kórsetedi, turaqlı kofe ishiwshilerde as sińiriw hám azıqlıq zatlardıń sorılıwında qatnasıwshı trillionlap mikroorganizmlerden ibarat ishek mikrobiomasınıń quramı basqasha boladı.
Kofe awqatlanıwımızdaǵı polifenollar – antioksidant birikpelerdiń tiykarǵı dereklerinen biri esaplanadı hám paydalı mikroblar áyne usı zatlar menen azıqlanadı. Sonday-aq, ol az muǵdarda talshıq (kletchatka) saqlaydı.
Biraq kofeni ishek salamatlıǵı ushın qural sıpatında qollanıwda waqıt faktorı áhmiyetli. Kofein ayırım adamlarda organizmde 12 saatqa shekem saqlanıp qalıwı múmkin hám uyqı sapasın buzadı. Qánigeniń atap ótiwinshe, jaman uyqı ishek salamatlıǵına unamsız tásir etedi. Uyqısızlıq artınan nadurıs awqat tańlaw ádeti payda bolıwı da múmkin, bul bolsa as sińiriw sistemasına jáne de unamsız tásir etedi.
Sol sebepli, dietolog kofeinli kofeni túslikke shekem ishiwdi, kúnniń ekinshi yarımında bolsa kofeinsiz kofe yamasa shópli shayǵa ótiwdi usınıs etedi.

Qaraqalpaqstan xabar agentligi