Universitet járdemge mútáj shańaraqlardıń perzentlerin oqıw orayında programmalastırıw, jasalma intellekt, robototexnika boyınsha 6 aylıq oqıw kurslarında biypul oqıtpaqshı. Bir ǵana usı arqalı jılına 5 mıńnan aslam jámlespegen jaslardıń zamanagóy bilimlerdi iyelewi ushın sharayat jaratıladı.
Yamasa Tashkent agrar universiteti mexanizaciya hám agroinjenerlik baǵdarındaǵı studentlerin “dual” bilimlendiriw tiykarında tikkeley Shırshıqtaǵı agro-tex klasterinde oqıtpaqshı. Olar bir waqıtta islep, aylıq aladı.
Sonday-aq, universitette hár biri 5 studentten ibarat “Keleshek fermerleri” eksperimental toparları shólkemlestiriledi. Bul jámáátler oqıw jılı dawamında 10 sotıx jerdi ózlestirip, ózleri egin egedi. Olar jerdiń ónimdarlıǵın arttırıw, zúráátli hám joqarı dáramat alıw kórsetkishlerinen kelip shıǵıp, kurstan kursqa ótedi.
Qalǵan barlıq joqarı oqıw orınları bul unamlı tájiriybelerden úlgi alıwı zárúr ekenligi atap ótildi.
Endi orınlarda mine usınday oraylardı shólkemlestirip, járdemge mútáj shańaraqlardaǵı jaslardı biypul oqıtıwdı jolǵa qoyǵan oqıw orayları jer hám múlk salıǵınan azat etiledi, kommunallıq qárejetleriniń yarımı byudjetten qaplap beriledi, oqıtıwshılarǵa tólengen dáramat salıǵı hám sociallıq salıq “keshbek” sıpatında qaytarıladı.
Prezident Shavkat Mirziyoevtiń “Kóksaray” rezidenciyasında jaslar menen sóylesiwi dawam etpekte.

ÓzA