Ózbekstanda kóp jıllıq miyneti hám joqarı mamanlıǵı menen bilimlendiriw sistemasında jumıs alıp barıp atırǵan muǵallimlerdi qollap-quwatlawǵa qaratılǵan jańa mexanizm engizildi.
Atap aytqanda, Ministrler Kabinetiniń 2026-jıl 19-fevralda qabıl etilgen 69-sanlı qararına muwapıq, joqarı kategoriyaǵa iye hám keminde 15 jıllıq pedagogikalıq stajǵa iye muǵallimlerge ipoteka tiykarında turaq jay satıp alıw ushın mámleketlik subsidiya beriledi.
Qararǵa bola, usı kategoriyadaǵı pedagoglar ushın ipoteka kreditiniń baslanǵısh tóleminiń 25 procenti mámleket tárepinen qaplap beriledi. Sonday-aq, kredittiń dáslepki 5 jılı dawamında procent tólemleriniń bir bólegi de subsidiyalanadı. Bul bolsa muǵallimlerdiń finanslıq júgin sezilerli dárejede jeńillestiredi.
Maǵlıwmat ornında aytıw kerek, bul jeńillikten paydalanıw ushın talaban joqarı mamanlıq kategoriyasına (bas oqıtıwshı lawazımına) iye bolıwı, keminde 15 jıllıq pedagogikalıq jumıs stajına iye bolıwı kerek.
Mexanizm ashıq-aydın hám operativ tártipte ámelge asırıladı. Talaban bank belgilegen óz úlesin qáliplestirgennen soń, bank 1 jumıs kúni ishinde ipoteka kreditin rásmiylestiredi. Turaq jay talaban atına rásmiylestirilip, kadastr hújjetleri bankke usınıladı.
Subsidiya ajıratıw procesi sanlı platforma arqalı ámelge asırıladı. Bank 1 jumıs kúni ishinde “subsidyplatform.mf.uz” arqalı Ekonomika hám qarjı ministrligine tólem boyınsha buyırtpa jiberedi.
Bul baǵdarlamanı qarjılandırıw ushın hár jılı mámleketlik byudjetten 200 milliard sumǵa shekem qarjı qaratılıwı rejelestirilgen. Jeńillikten paydalanıwshı muǵallimlerdiń dizimin bolsa Mektepke shekemgi hám mektep bilimlendiriwi ministrligi jáne Kámbaǵallıqtı qısqartıw hám bántlik ministrligi qáliplestiredi.
Jańa tártip tájiriybeli hám joqarı mamanlıqtaǵı pedagoglardı materiallıq xoshametlew, olardıń sociallıq qorǵalıwın kúsheytiw hám bilimlendiriw tarawında úzliksizlikti támiyinlewge xızmet etedi.

Sh.Mamaturopova, ÓzA