DMO Karakalpakstan (Destination Management Organization of Karakalpakstan) jámiyetlik birlespesi tárepinen «QR Gastronomic Quality: Qaraqalpaqstannıń tartımlılıǵın arttırıw ushın turizm xızmetleriniń gastronomiyalıq sapasın bahalaw hám jaqsılaw» joybarı sheńberinde seminar-trening shólkemlestirildi.
Bul joybar Ózbekstan Respublikası Oliy Majlisi janındaǵı Puqaralıq jámiyeti institutların qollap-quwatlaw jámiyetlik fondınıń sociallıq buyırtpası tiykarında ámelge asırılmaqta.
Seminarǵa respublikamızdaǵı restoran hám kafelerdiń iyeleri hám xızmetkerleri, ónermentler, Berdaq atındaǵı Qaraqalpaq mámleketlik universitetiniń “Ekonomika, turizm hám biznesti basqarıw” kafedrasınıń professor-oqıtıwshıları hám studentleri, gastronomiyalıq hám turistlik joybarlardıń wákilleri qatnastı.
Seminar dawamında gastronomiyada ekoturaqlılıqtıń tiykarǵı máseleleri, sonıń ishinde, restoran biznesiniń ekologiyalıq tásiri, “jasıl” ámeliyatlardı engiziw boyınsha xalıqaralıq tájiriybe, jergilikli hám máwsimlik ónimlerden paydalanıw, sonday-aq, azıq-awqat hám azıq-awqat emes shıǵındılardı azaytıw máseleleri boyınsha pikir-usınıslar bildirildi. Shıǵındı ámeliyatları, ekologiyalıq qadaqlaw hám jergilikli islep shıǵarıwshılar menen birge islesiw máselelerine ayrıqsha itibar qaratıldı.
Ámeliy bólimde qatnasıwshılar ekologiyalıq imidjdi qáliplestiriw hám regionnıń gastronomiyalıq hám turizm tarawında turaqlı ámeliyatlardı rawajlandırıwǵa úles qosatuǵın ekologiyalıq turaqlı sheshimlerdi engiziw boyınsha individual rejelerdi islep shıqtı.
Seminar dawamında qatnasıwshılar ózlerin qızıqtırǵan sorawlarǵa juwap aldı.

Á.Jiyemuratov,
Qaraqalpaqstan xabar agentligi.