Ózbekstannıń xalıqaralıq sherikler menen sawda-ekonomikalıq baylanısları keńeyip, kóplegen tarawlar qatarında awıl xojalıǵı hám fitosanitariya baǵdarında nátiyjeli kelisimlerge erisilmekte. Pakistannıń Islamabad qalasında Pakistan-Ózbekstan Húkimetleraralıq birgeliktegi komissiyasınıń 10-májilisi bolıp ótti.
Ilaj sheńberinde sawda-ekonomikalıq baylanıslar menen bir qatarda awıl xojalıǵı hám fitosanitariya tarawlarındaǵı birge islesiw máseleleri de dodalandı. Májiliste Ósimlikler karantini hám onı qorǵaw agentligi direktorınıń orınbasarı Uluǵbek Yunusov qatnastı.
Sóylesiwler dawamında tárepler 2025-jıl 18-dekabr kúni eki mámleket Karantin xızmetleri arasında qol qoyılǵan áhmiyetli hújjetti ayrıqsha atap ótti. Bul Bayanlama Ózbekstannan Pakistanǵa ánar, júzim hám qáreli eksportı ushın mólsherlengen fitosanitariyalıq talaplardı belgilep beredi. Bul kelisim eki mámleket arasında óz-ara sawdanı keńeytiw jolındaǵı áhmiyetli qádem sıpatında bahalandı, delinedi Ósimlikler karantini hám onı qorǵaw agentliginiń maǵlıwmatında.
Sonday-aq, tárepler Ózbekstannan Pakistanǵa alma, ánjir, limon hám ashshı burısh eksportın jolǵa qoyıw boyınsha fitosanitariyalıq talaplar haqqındaǵı gezektegi Protokolǵa qol qoyıwǵa tayar ekenligin bildirdi.
Dodalawlar juwmaǵında fitosanitariya tarawındaǵı birge islesiwdi sistemalı jolǵa qoyıw maqsetinde Birgeliktegi jumısshı topar dúziwge kelisip alındı. Bul topar miywe-ovoщ ónimleri boyınsha bazar talapların úyreniw, málimleme almasıwın kúsheytiw hám texnikalıq máselelerdi muwapıqlastırıw menen shuǵıllanadı.

A.RUSTAMOV, ÓzA