Usı jıl 13-fevral kúni Prezidentimizdiń basshılıǵında tarmaq hám aymaqlarda joqarı ekonomikalıq ósiw pátlerin támiyinlew boyınsha tiykarǵı wazıypalardı dodalawǵa baǵıshlanǵan videoselektor májilisi bolıp ótken edi. Onda investiciyalardı tartıw hám tovarlardı qayta islewdi shólkemlestiriw boyınsha wazıypalar belgilendi.
Mámleketimiz basshısınıń tikkeley baslamaları menen elimizde qayta islew operaciyalarınıń kólemi túp-tiykarınan keńeymekte, isbilermenler sırt elden shiyki zat alıp kelip, hesh qanday bajıxana tólemleri hám sheklewlersiz onı qayta islew jáne tayar ónim sıpatında eksport etiw huqıqına iye boldı.
Biraq, búgingi kúnge shekem bir qatar rayonlardaǵı kárxanalar bul imkaniyattan paydalanbaǵanı qattı sınǵa alındı hám usı rayonlardaǵı isbilermenlik subektlerine bajıxana rejiminiń abzallıqları boyınsha keńnen úgit-násiyatlaw jumısların alıp barıw wazıypası belgilendi.
Usı wazıypalardan kelip shıǵıp, aymaqtaǵı isbilermenler menen Bajıxana komitetiniń juwapker wákilleri hám Qaraqalpaqstan Respublikası Bajıxana basqarmasınıń xızmetkerleri tárepinen úgit-násiyatlaw jumısları alıp barıldı. Isbilermenler menen ashıq sáwbetlesiw ótkerilip, “Bajıxana aymaǵında qayta islew” bajıxana rejiminiń abzallıqları túsindirildi.
Ilaj dawamında isbilermenlerge qanday shiyki zatlardı alıp kelip, ónim islep shıǵarıw hám onı sırtqı bazarlarǵa satıw imkaniyatları mısallar menen túsindirildi.
Maǵlıwmat ushın, Qaraqalpaqstan Respublikasında 2025-jıl dawamında usı rejimniń abzallıqlarınan 10 iri kárxana nátiyjeli paydalanǵan. Atap aytqanda, bahası 4,5 million dollardan aslam bolǵan 16,6 mıń tonna shiyki zat bajıxana aymaǵında qayta islenip, nátiyjede 6,3 million dollarlıq tayar ónimlerdiń sırtqı bazarǵa shıǵarılıwı támiyinlengen.
Ilajlarda qatnasıwshılar ózlerin qızıqtırǵan sorawlarǵa juwap aldı.

Á.Jiyemuratov,
Qaraqalpaqstan xabar agentligi