Nókis garnizonındaǵı áskeriy bólimde “Úsh áwlad ushırasıwı” ruwxıy-aǵartıwshılıq ilajı bolıp ótti. Bul ushırasıw Arqa-batıs áskeriy okrugi veteranlar keńesi hám otstavkadaǵı áskeriy xızmetkerlerdiń qatnasıwında ótkerilip, áskeriy xızmetkerler, jas áskerler hám veteranlar arasında ashıq pikirlesiw maydanına aylandı.
Ilajda shıǵıp sóylegenler jas áwladtı áskeriy-watansúyiwshilik ruwxında tárbiyalaw, olarda milliy maqtanısh, Watanǵa sadıqlıq hám joqarı juwapkershilik sezimlerin qáliplestiriw búgingi kúnniń áhmiyetli wazıypalarınan biri ekenin ayrıqsha atap ótti. Sonday-aq, ǵárezsizlik jıllarında Qurallı Kúshler sistemasında ámelge asırılǵan keń kólemli reformalar, áskeriy xızmetkerler ushın jaratılıp atırǵan zamanagóy sharayatlar, sociallıq qorǵaw hám xoshametlew mexanizmleriniń jetilistiriliwi haqqında hár tárepleme pikir alısıldı.
Ushırasıw dawamında túrli dáwirlerde Watandı qorǵaw jolında pidayılıq penen xızmet etken veteran áskerler ózleriniń bay turmıslıq tájiriybesi, xızmet dawamında dus kelgen sınaqları hám juwapkershilikli jáne maqtanıshlı xızmeti haqqında aytıp berdi. Veteranlar tárepinen keltirilgen turmıslıq waqıyalar hám mártlik úlgileri jas áskeriy xızmetkerlerde úlken tásir qaldırdı. Ashıqtan-ashıq sóylesiw tárizinde ótken ushırasıw soraw-juwaplarǵa bay bolıp, onda jaslar ózlerin qızıqtırǵan máseleler boyınsha tolıq maǵlıwmat alıw imkaniyatına iye boldı.

Qaraqalpaqstan xabar agentligi