Saudiya Arabstanında ótkerilip atırǵan abıraylı “Makkah Halal Forum” xalıqaralıq kórgizbesi sheńberinde Ózbekstan Sawda-sanaat palatası hám Ullı Britaniya Musılmanları sawda forumı shólkemi arasında óz-ara túsinisiw memorandumına qol qoyıldı.
Bul áhmiyetli hújjetti Ózbekstan SSP baslıǵınıń birinshi orınbasarı Davronbek Qurbonov hám Britaniya shólkeminiń baslıǵı Iqbol Sakroniy rásmiylestirdi. Bul kelisim eki mámleket arasındaǵı sawda-ekonomikalıq baylanıslardı keńeytiw, biznes ortalıǵın janlandırıw hám perspektivalı birgeliktegi joybarlardı turmısqa engiziwdiń anıq mexanizmin belgilep beredi.
Memorandum sheńberinde óz-ara sawda delegaciyalarınıń saparların shólkemlestiriw, ekonomikalıq kórsetkishler hám statistikalıq maǵlıwmatlar almasıw, sonday-aq, birgelikte iri yarmarka hám kórgizbeler shólkemlestiriw maqset etilgen. Sonıń menen birge, texnikalıq ekspertiza hám bilimlendiriw tarawındaǵı birge islesiwdi qollap-quwatlaw arqalı kadrlar potencialın arttırıwǵa ayrıqsha itibar qaratıladı.
Islam turizmin rawajlandırıw, milliy zergerlik sanaatına sırt el investiciyasın tartıw, jergilikli mineral tóginler eksportın kóbeytiw hám zamanagóy konsalting xızmetin jolǵa qoyıw tiykarǵı baǵdarlar etip belgilendi. Bul baslama Ózbekstan hám Ullı Britaniya biznes jámiyetshiligi ushın jańa imkaniyatlar esigin ashıw menen birge ekonomikalıq qatnasıqlardı sapa jaǵınan jańa basqıshqa kóteretuǵını sózsiz.

F.Yaxshiboeva, ÓzA