Siz, ázizlerdi, elimizdegi barlıq mómin-musılmanlardı hám pútkil xalqımızdı múbárek Ramazan ayı kirip keliwi múnásibeti menen qızǵın qutlıqlap, barlıq jaqsı tileklerdi bildiremiz.
Kewillerimiz quwanıshqa hám jaqsı tileklerge tolǵan bul baxıtlı hám quwanıshlı demlerde bárinen burın usınday teberik kúnlerge jetkergeni, Ramazan ayın tınıshlıq-tatıwlıqta, shańaraǵımız, el-jurtımız benen awızbirshilikte kútip alıp atırǵanımız ushın Jaratqanǵa sheksiz shúkirler etemiz.
Xalqımız ásirler dawamında ullı diniy qádiriyat, saqıylıq hám miyrim-shápáát tımsalı sıpatında qádirlep kiyatırǵan bul ullı áyyyam keyingi waqıtta jámiyetlik turmısımızda jáne de bekkem orın iyelep atırǵanı, álbette, bárshemizdi quwandıradı.
Biz insan qádirin onıń diniy tarawdaǵı huqıqları hám mápleri menen óz-ara baylanıslı halda kóremiz. Sonlıqtan, sonǵı jılları elimizde diniy qádriyatlarımızdı tiklew, biybaha ilimiy-aǵartıwshılıq miyrasımızdı úyreniw hám úgit-násiyatlaw baǵdarında úlken jumıslar ámelge asırılmaqta.
Jámiyettegi sociallıq-ruwxıy ortalıqtı jáne de jaqsılaw, hár bir insannıń, bárinen burın jaslardıń, ómirde múnásip orın iyelewine járdemlesiwge qaratılǵan adamgershilik ruwxındaǵı islerimizdiń áhmiyetin xalqımız, álbette, jaqsı túsinedi hám olardı ámelge asırıwǵa belsene qatnasadı, dep bekkem isenemiz.
Áziz watanlaslar!
Sizlerdi, pútkil xalqımızdı elimizde keńnen belgilenip atırǵan múbárek Ramazan ayı kirip keliwi múnásibeti menen jáne bir márte shın júrekten qutlıqlap, bársheńizge saw-salamatlıq, baxıt-ıǵbal, shańaraqlarıńızǵa tınıshlıq, qut-bereket tileymiz.
Ana Watanımız tınısh, turmısımız abadan bolsın!

Amanbay Orınbaev,
Qaraqalpaqstan Respublikası Joqarǵı Keńesiniń Baslıǵı