Nókis qalasındaǵı Innovaciyalıq texnologiyalar universitetinde sud-huqıq tarawında ámelge asırılıp atırǵan reformalar, korrupciyaǵa qarsı gúresiw ilajları hám sudlarda engizilgen interaktiv xızmetler boyınsha keń jámiyetshilikti xabardar etiw maqsetinde ushırasıw shólkemlestirildi.
Onda Qaraqalpaqstan Respublikası Hákimshilik sudınıń sudyaları J.Aymaganbetova, K.Xojamuratov hám A.Imatov, Nókis rayonlar aralıq Hákimshilik sudınıń sudyası K.Babanazarov, universitettiń professor-oqıtıwshıları hám student-jasları qatnastı.
Ilaj dawamında sudyalar mámlekette korrupciyaǵa qarsı ámelge asırılıp atırǵan reformalar haqqında hár tárepleme maǵlıwmat berdi. Atap aytqanda, Korrupciyaǵa qarsı gúresiw agentligi hám nızamshılıq tiykarları bekkemlengeni, mámleketlik basqarıwda ashıq-aydınlıq, mápler soqlıǵısıwın tártipke salıw hám mámleketlik satıp alıwlardı sanlastırıwǵa qaratılǵan ilajlar ámelge asırılıp atırǵanı atap ótildi.
– Sud sistemasında da “Sanlı sud” principi engizilip, isler elektron túrde júrgiziledi hám sud isleri avtomatikalıq túrde bólistiriw sisteması arqalı qalıs kórip shıǵıladı, – deydi Qaraqalpaqstan Respublikası Hákimshilik sudınıń sudyası Azat Imatov. – Keleshekte sud jumıslarında jasalma intellekttiń imkaniyatları da qollanıladı. Sonday-aq, my.sud.uz portalı arqalı puqaralar hám isbilermenler ózleriniń arzaların hám shaǵımların onlayn jiberiwi, tólemlerdi ámelge asırıwı hám videokonferencbaylanıs arqalı aralıqtan qatnasıw imkaniyatı jaratılǵan. Bul bolsa sudlarǵa múrájat etiwde ashıq-aydınlıqtı támiyinlep, sud hákimiyatına bolǵan isenimdi bekkemlewge xızmet etpekte.
Ushırasıwda studentler tárepinen sudyalarǵa sorawlar berilip, olarǵa juwaplar aldı. Ótkerilgen ilajda qatnasıwshılar sud sistemasındaǵı jańalıqlar, elektron xızmetler hám korrupciyaǵa qarsı mexanizmler boyınsha ózleri ushın áhmiyetli hám ámeliy kónlikpelerge iye boldı.

Adilbay Orazov,
Qaraqalpaqstan xabar agentligi sholıwshısı