Jáhán ekonomikasındaǵı ózgerisler, jańa investiciya aǵımları hám infrastruktura joybarları mámleketler arasındaǵı sawda-ekonomikalıq baylanıslardı jáne de jedellestiriwdi talap etpekte. Usı kózqarastan mámleketimizdiń jetekshi xalıqaralıq sherikler menen ámeliy sóylesiwleri izbe-iz dawam ettirilmekte.
Búgin Ózbekstan Respublikası Bas ministriniń orınbasarı – ekonomika hám qarjı ministri Jamshid Qwchqorov hám Ullı Britaniyanıń Ázerbayjan hám Oraylıq Aziya boyınsha sawda wákili Lord Jon Olderdeys arasında ótkerilgen ushırasıw da mine usınday sóylesiwlerden biri bolıp esaplanadı. Onda ministrlik basshılıǵınıń wákilleri, sonday-aq, Ullı Britaniyanıń Ózbekstandaǵı elshixanası jáne bir qatar xalıqaralıq finanslıq hám injenerlik kompaniyalarınıń qánigeleri qatnastı.
Sóylesiw waqtında Ózbekstan hám Ullı Britaniya arasındaǵı sawda-ekonomikalıq qatnasıqlardıń búgingi jaǵdayı, olardı bunnan bılay da rawajlandırıw imkaniyatları hám jańa birgeliktegi joybarlardı ámelge asırıw perspektivaları hár tárepleme kórip shıǵıldı. Mámleketimizde keyingi jıllarda alıp barılıp atırǵan ekonomikalıq reformalar, investiciyalıq ortalıqtı jaqsılaw, makroekonomikalıq turaqlılıqtı támiyinlew hám jeke menshik sektordıń qatnasın keńeytiw boyınsha ámelge asırılǵan jumıslar haqqında maǵlıwmat berildi.
Atap ótilgenindey, transport hám logistika infrastrukturasın jetilistiriw, temir jol hám avtomobil jolların qurıw, aeroportlardı modernizaciyalaw, energetika tarmaǵında qayta tikleniwshi energiya dereklerinen paydalanıwdı keńeytiw, sonday-aq, mámleketlik-jeke menshik sheriklik tiykarındaǵı joybarlardı rawajlandırıw úlken áhmiyetke iye. Soǵan bola, ilajda usı baǵdarlar, mámleketlik kárxanalar hám banklerdi transformaciyalaw, menshiklestiriw processlerin jedellestiriw jáne milliy kompaniyalardı xalıqaralıq kapital bazarlarına shıǵarıw máseleleri de dodalandı.
Ushırasıw dawamında Britaniyanıń “ArupInternational Projects LTD” kompaniyası tárepinen Samarqand wálayatı CHelak qalashası oraylıq kóshesin rawajlandırıw boyınsha islep shıǵılıp atırǵan master reje koncepciyası unamlı bahalandı. Tárepler bunday joybarlar aymaqlardıń turaqlı rawajlanıwına xızmet etetuǵının atap ótti.
Sóylesiw juwmaǵında ministrlik hám usı kompaniya arasında aymaqlardı kompleksli rawajlandırıw, injenerlik hám transport infrastrukturasın jetilistiriw jáne qánigelerdiń potencialın arttırıwǵa qaratılǵan birge islesiwdi qollap-quwatlaw boyınsha túsinisiw memorandumına qol qoyıldı. Tárepler keleshekte óz-ara paydalı sheriklikti bunnan bılay da bekkemlew hám birgeliktegi baslamalardı ámelge asırıwǵa tayar ekenin bildirdi.

Nasiba Ziyodullaeva, ÓzA