Óziniń quramın bir qatar kúshli oyınshılar menen kúsheytip alǵan Nókistiń «Aral» klubı usı kúnleri Tashkent qalasında oqıw-jıyın shınıǵıwların ótkerip, jańa máwsimge puqta tayarlıqlar kórmekte.
Atap aytqanda, komandamız 15-fevral kúni Sırdárya wálayatınıń «Guliston» klubına qarsı joldaslıq oyının ótkerip, onda 1:2 esabında jeńilip qaldı.
Al, búgin bolsa, «Aral» klubı futbolshıları Tájikstannıń «CSKA Pamir» komandasına qarsı maydanǵa tústi. Qızıqlı ótken oyınnıń birinshi taymında dárwazalarǵa gol urılmadı. Ekinshi taymda bolsa, hár eki komanda da tez-tezden qáwipli hújimler shólkemlestirdi hám oyınnıń 67-minutında tájikstanlı futbolshılar «Aral» dárwazasın anıq nıshanǵa alıwǵa eristi. Bunnan soń komandamız aǵzaları da oyınǵa ayrıqsha pát endirip, 71-minutta tájiriybeli Salamat Qutıbaev qarsılas dárwazaǵa gol urdı hám aradaǵı esaptı teńlestiriwge miyasar boldı.
Bul goldan soń da eki komanda da gol urıw ushın imkaniyatlar boldı. Biraq, bul múmkinshiliklerden futbolshılar durıslı paydalana almadı. Solay etip, oǵada qızıqlı ótken oyın 1:1 esabı menen juwmaqlandı.

Adilbay Orazov,
Qaraqalpaqstan xabar agentligi sholıwshısı