Múnásibet

Mámleketimizdiń rawajlanıwı jańa basqıshqa qádem qoyıp, reformalardıń nátiyjesi endi, olardıń qabıl etiliwi menen emes, al ámeldegi nátiyjesi menen bahalanbaqta. 2026-jıl ushın qabıl etilgen Mámleketlik baǵdarlama mine, usı principke tiykarlanıp islep shıǵılǵan bolıp, ol strategiyalıq maqsetlerdi anıq ámeliy mexanizmler menen úylestirgen áhmiyetli siyasiy-huqıqıy hújjet bolıp esaplanadı.
Bul baǵdarlama “Ózbekstan – 2030” strategiyası sheńberinde belgilengen tiykarǵı wazıypalardı izbe-iz dawam ettirip, ekonomikalıq ósiwdi támiyinlew menen birge, onıń nátiyjesin xalıqtıń abadanlıǵına baǵdarlawdı názerde tutadı. Onda ekonomikanı modernizaciyalaw, sanaattı diversifikaciyalaw, sanlı texnologiyalardı keńnen engiziw, investiciyalıq ortalıqtı jaqsılaw sıyaqlı wazıypalar belgilengen.
Ekonomikalıq reformalar jańa jumıs orınların jaratıw, xalıqtıń dáramatların arttırıw hám ishki bazar turaqlılıǵın bekkemlewge xızmet etedi. Sonıń menen birge, isbilermenlik subektlerin qollap-quwatlaw, eksport potencialın arttırıw hám innovaciyalıq ósiw modelin qáliplestiriw globallıq básekilik sharayatında mámleketimizdiń ekonomikalıq turaqlılıǵın támiyinleydi.
Baǵdarlamada máhállelerdi rawajlandırıw máselesine ayrıqsha itibar qaratılǵan. Sebebi, reformalardıń haqıyqıy nátiyjesi orınlarda, xalıqtıń turmısında kórinedi. Infrastrukturanı jaqsılaw, bántlikti támiyinlew, sociallıq mashqalalardı mánzilli sheshiw – hámmesi máhálle kesiminde ámelge asırıladı. Bul bolsa jergilikli keńesler hám deputatlarǵa úlken juwapkershilik júkleydi. Sonday-aq, sociallıq qorǵawdı kúsheytiw, bilimlendiriw hám densawlıqtı saqlaw tarawında sapa ózgerislerin ámelge asırıw, járdemge mútáj qatlamlardı qollap-quwatlaw sıyaqlı wazıypalar jámiyette ádillik ortalıǵın bekkemlewge qaratılǵan.
Sud-huqıq tarawın jetilistiriw, nızam ústinligin támiyinlew hám korrupciyaǵa qarsı gúresiw mexanizmlerin kúsheytiw de baǵdarlamanıń tiykarǵı baǵdarlarınan esaplanadı.
Deputat sıpatında atap ótpekshimen, 2026-jılǵı Mámleketlik baǵdarlama – bul Jańa Ózbekstandı qurıw jolındaǵı izbe-iz hám juwapkershilikli qádem bolıp esaplanadı. Onıń tabısı atqarıw tártibi, parlamentlik qadaǵalaw hám jámiyetshiliktiń qatnasıwınıń nátiyjeliligine baylanıslı.
Juwmaqlap aytqanda, bul baǵdarlama strategiyalıq maqsetlerdi turmısqa engiziw arqalı turaqlı ekonomikalıq ósiw, sociallıq ádillik hám puqaralardıń abadanlıǵın támiyinlewge xızmet etedi. Eń áhmiyetlisi, reformalar insan mápin ústin qoyǵan rawajlanıw modeli tiykarında ámelge asırılıp atırǵanı bolıp esaplanadı.

Gúljan Xalmuratova,
Oliy Majlis Nızamshılıq palatasınıń deputatı.
Qaraqalpaqstan xabar agentligi.