Múbárek Ramazan ayında mámleketimizde sociallıq qorǵawǵa mútáj xalıqtı qollap-quwatlawǵa qaratılǵan keń kólemli qayırlı baslama ámelge asırılmaqta.
Bul háreketler xalıqtıń járdemge mútáj qatlamların hár tárepleme qollap-quwatlaw, sociallıq ádillikti bekkemlew hám insanıylıq principlerin turmısqa engiziwde úlken áhmiyetke iye.
Sociallıq qorǵaw milliy agentligi hám “Vaqf” qayırqomlıq jámiyetlik fondı tárepinen qayırqomlıq baǵdarlaması jolǵa qoyılmaqta. Baǵdarlama tiykarında 700 mıń shańaraqqa materiallıq járdem kórsetiledi.
Atap aytqanda, baslama sheńberinde Sociallıq reestrdegi “mámleket támiynatındaǵı shańaraq” kategoriyasına kiriwshi shańaraqlarǵa, basqalardıń kútimine mútáj bolǵan jalǵız jasawshı hám jalǵız kekseler hám mayıplıǵı bolǵan puqaralarǵa – 1 million sum, “Kámbaǵal shańaraq” kategoriyasındaǵı jáne máhálle tárepinen qosımsha dizimge kirgizilgen shańaraqlarǵa – 500 mıń sum bir mártelik járdem beriledi.
Sonday-aq, 6 mıń nawqas puqaranıń emleniwi hám zárúr operaciya qárejetleri tolıq qaplap beriledi.
Járdemler anıq normalar tiykarında, Sociallıq reestr arqalı ámelge asırıladı. Bul bolsa tek ǵana sociallıq qorǵaw sistemasınıń qamtıp alıwın keńeytiw emes, al xalıqtıń densawlıǵın qorǵaw hám turmıs sapasın jaqsılawǵa da xızmet etedi.
Baslama sociallıq qollap-quwatlaw sistemasın jańa, institucionallastırılǵan model tiykarında ámelge asırıwǵa qaratılǵan.

Muhayyo Toshqoraeva, ÓzAnıń xabarshısı