Jasalma intellekt hám sanlı texnologiyalar dúnyada ekonomikalıq hám sanaat potencialın arttırıwda áhmiyetli rol atqarmaqta. Bul tarawda aldınǵı tájiriybelerdi úyreniw hám birge islesiwdi rawajlandırıw búgingi kúnniń talaplarınan bolıp esaplanadı.
Hindstanda bolıp ótip atırǵan “India AI Impact Summit 2026” sammiti usınday maqsetler menen úzliksiz baylanıslı. Kóplegen mámleketlerdiń wákilleri qatnasıp atırǵan bul xalıqaralıq ilajda jasalma intellektti basqarıw hám onı ámeliyatqa engiziw máseleleri boyınsha pikir alısılmaqta.
Áhmiyetli tárepi, sammitke Ekonomika hám qarjı ministrliginiń wákilleri de qatnaspaqta.
Ekonomika hám qarjı ministrliginiń Yarımótkizgishler hám elektronika tarawın jedel rawajlandırıwdı muwapıqlastırıw bóliminiń baslıǵı Azizjon Akramovtıń atap ótkenindey, bunday sóylesiwler tarawdıń rawajlanıwında áhmiyetli esaplanadı.
– Men sammit sheńberinde ótkerilgen “Keleshekti qarjılandırıw: Aziya hám Tınısh okeanı regionı ushın jasalma intellektke tayar sanlı infrastrukturanı jaratıw” temasındaǵı panel sessiyasına qatnastım. Ol jasalma intellekt hám sanlı infrastruktura tarawındaǵı zamanagóy texnologiyalardı úyreniw ushın úlken imkaniyat jarattı. Ózbekstanda yarımótkizgishler hám mikroelektronika tarawın rawajlandırıw, sanlı infrastrukturanı bekkemlew hám xalıqaralıq tájiriybeni engiziw biziń tiykarǵı wazıypamız bolıp esaplanadı. Sol sebepli, bunday ilajlar biz ushın jaqsı tájiriybe boladı, – dedi Azizjon Akramov.
Házirgi waqıtta “India AI Impact Summit 2026” sammiti óz jumısın dawam ettirmekte.

N.Ziyodullaeva, ÓzA