Búgingi kúnde sanlastırıw processleri ekonomikanıń barlıq tarawlarına, atap aytqanda, korporativ basqarıw sistemasına da jedel kirip barmaqta.
Qımbat bahalı qaǵazlar Oraylıq depozitariysiniń “E-VOTE – Elektron dawıs beriw” platforması bul baǵdardaǵı reformalardıń ámeliy nátiyjesi bolıp, 2025-jıldıń juwmaqları korporativ sektorda sanlı isenim jańa basqıshqa kóterilgenin kórsetpekte.
Ótken jıl dawamında jámi 19 iri akcionerlik jámiyeti óz korporativ ilajların Oraylıq depozitariydiń sanlı infrastrukturasına isenip tapsırdı. Jámi ótkerilgen 49 ulıwma májilistiń salmaqlı bólegi, yaǵnıy 31 i gezeksiz májilislerdiń úlesine tuwra keliwi kompaniyalardıń operativ túrde hám strategiyalıq qararlardı qabıl etiwde áyne E-VOTE platformasına súyenip atırǵanınan derek beredi.
Bul processler tek ǵana emitentler emes, al investorlar ushın da qolaylıq jaratıp, májilislerge qatnasıw geografiyasın keńeytti. 2025-jılı platforma arqalı jámi 822 akcioner óz huqıqlarınan paydalanǵan halda aralıqtan dawıs berdi. Olardıń 324 i jıllıq, 498 i gezeksiz májilislerge qatnasqanı akcionerlerdiń jámiyetti basqarıwdaǵı belsendiligi artqanın tastıyıqlaydı.
Búgingi kúnde E-VOTE tek ǵana ápiwayı dawıs beriw quralı emes, al korporativ qatnasıqlar ushın keń kólemli sanlı ekosistemaǵa aylanǵan.
Platforma akcionerlik jámiyetleriniń ulıwma májilislerinen tısqarı, Baqlaw keńesleriniń májilislerin hám juwapkershiligi sheklengen jámiyetler shólkemlestiriwshileriniń májilislerin aralıq formatta, huqıqıy jaqtan jetik tárizde ótkeriw imkaniyatın beredi.
Sistemanıń OneID (Birden-bir identifikaciya sisteması) menen integraciyalanǵanı hár bir qatnasıwshınıń shaxsın isenimli tastıyıqlawda hám dawıs beriw nátiyjeleriniń qol qatılmaslıǵın támiyinlewde joqarı qáwipsizlik dárejesin kepilleydi.
Esletip ótemiz, Oraylıq depozitariy korporativ ilajlardı onlayn formatqa ótkeriw hám bazar infrastrukturasın modernizaciyalaw maqsetinde bul xızmetti 2020-jılı engizgen edi. Sol waqıttaǵı innovaciyalıq qádem búgin mámleketimizdiń kapital bazarında korporativ basqarıwdıń ajıralmas hám standart quralına aylandı.
E-VOTE platformasınıń ǵalaba en jayıwı waqıttı únemlew, shólkemlestiriw qárejetlerin qısqartıw hám korporativ basqarıwda ashıq-aydınlıqtı támiyinlew jolındaǵı strategiyalıq jetiskenlik bolıp esaplanadı. Oraylıq depozitariy keleshekte de qarjı bazarın sanlastırıw hám investorlar ushın innovaciyalıq sheshimlerdi usınıwdı dawam ettiredi.

Hamroz Bayanov, ÓzA