Ózbekstannıń Jáhán sawda shólkemine aǵza bolıw procesinde ekonomikalıq turaqlı rawajlanıw hám óndiris standartların xalıqaralıq normalarǵa beyimlestiriw áhmiyetli esaplanadı. Sol sebepli, bul baǵdarda tek ǵana nızamshılıq emes, al neft hám gaz tarawında da keń kólemli texnikalıq reformalar ámelge asırılmaqta.
“Ózbekneftgaz” AJ málimleme xızmetiniń xabar beriwinshe, bul shólkem tárepinen bul baǵdardaǵı jumıslar izbe-izlik penen alıp barılmaqta. Atap aytqanda, STQ 35 “O‘zneftgazmahsulot” texnikalıq komiteti menen birgelikte neft hám gaz tarawında ámeldegi normativlik hújjetler xalıqaralıq standartlarǵa muwapıqlastırılmaqta. Bul bolsa ónimlerdiń sapası hám óndiris processlerin xalıqaralıq talaplar dárejesine alıp shıǵıw imkaniyatın beredi.
– Házirgi waqıtta ónimniń sapası, ólshew hám sınaw processleri xalıqaralıq normalar tiykarında jetilistirilmekte. Jámiyet sistemasında islep shıǵarılıp atırǵan tábiyǵıy gaz, benzin, dizel janılǵısı, sintetikalıq dizel hám aviaciya janılǵısı xalıqaralıq standartlarǵa muwapıq islep shıǵarılmaqta. Sınaw metodikaları hám akkreditaciya processleri de basqıshpa-basqısh xalıqaralıq talaplarǵa beyimlestirilmekte. Bul ózgerisler tek ǵana ónimlerdiń básekige shıdamlılıǵın arttırıw emes, al eksport geografiyasın keńeytiw, ásirese, Evropa bazarına kiriw imkaniyatların kúsheytiwge xızmet etedi. Sonıń menen birge, xalıqaralıq standartlarǵa sáykes óndiris sisteması sırt el investorlarınıń isenimin bekkemlewde de áhmiyetli faktor esaplanadı, – dedi usı shólkemniń málimleme xızmetiniń basshısı Mwmin Ibodov.
Mámleketimizdiń neft-gaz tarmaǵındaǵı bul reformalar tek ǵana milliy ekonomikanıń rawajlanıwına úles qosıp qoymastan, al xalıqaralıq bazarda mámleket ónimleriniń abırayın hám básekige shıdamlılıǵın sezilerli dárejede arttırıw imkaniyatın beretuǵının atap ótiw kerek. Bul bolsa keleshekte neft-gaz tarawınıń turaqlı hám nátiyjeli rawajlanıwı ushın bekkem tiykar jaratadı.

N.Ziyodullaeva, ÓzA