Qaraqalpaqstan Respublikası Awıl xojalıǵı ministrligi, Agrosanaattı rawajlandırıw agentliginiń aymaqlıq bólimi hám Ósimlikler karantini hám qorǵaw agentligi birgelikte ǵalaba xabar quralları ushın press-tur shólkemlestirdi.

Press-tur dawamında qánigeler tárepinen ıssıxana xojalıqların rawajlandırıw, sapalı hám qáwipsiz ónimlerdi jetistiriw, onda eksportqa mólsherlengen ónimlerdiń úlesin arttırıw maqsetinde ámelge asırılıp atırǵan jumıslar tuwralı maǵlıwmatlar berildi.
Ǵalaba xabar qurallarınıń wákilleri hám blogerler dáslep Beruniy rayonındaǵı “KASHFIYOTCHI YOSHLAR” jeke kárxanasına alıp barıldı.
Bul kárxana 2017-jılı Qubla Koreya texnologiyası tiykarında qurılǵan. Jámi 2 gektar maydandı iyelegen bul ıssıxanada pomidor hám qıyar jetistiriw jolǵa qoyılǵan. Qatnasıwshılar ıssıxanadaǵı eginlerdi tárbiyalaw processleri, tamshılatıp suwǵarıw sisteması, mikroklimattı basqarıw usılları, kesellik hám zıyankeslerge qarsı kórilip atırǵan ilajlar hám ónimleriniń sapası menen tanıstı.
Qánigeler tárepinen “Ósimlikler karantini haqqında”ǵı Nızam talaplarına muwapıq ıssıxanalarda fitosanitariyalıq qáwipsizlikti támiyinlew, zıyanlı organizmlerdiń tarqalıwınıń aldın alıw hám ónim qáwipsizligin kepillew baǵdarında ámelge asırılıp atırǵan jumıslar haqqında tolıq maǵlıwmat berildi. Atap aytqanda, Agentlik sistemasında 2026-jıl 15-yanvardan 16-fevralǵa shekem járiyalanǵan “Áhmiyetli 30 kúnlik” sheńberinde ıssıxanalarda kúsheytilgen fitosanitariyalıq qadaǵalaw ilajları alıp barılmaqta.
Ilajda Ósimlikler karantini hám qorǵaw agentliginiń kóshpeli laboratoriyası qánigeleri tárepinen ónimlerden úlgiler alınıp, laboratoriyalıq tekseriwler ótkerildi.
Press-turdıń gezektegi mánzili Ellikqala rayonında jumıs alıp barıp atırǵan «UMIDBEK ODILBEK» JShJ ıssıxana kompleksi boldı. 2020-jılı shólkemlestirilgen hám 3 gektar maydandı iyelegen bul ıssıxanada Qıtay texnologiyası tiykarında limon jetistirilmekte. Kompleks basshısı tárepinen ıssıxanadaǵı agrotexnikalıq ilajlar, ónimdarlıq kórsetkishleri, nál jetistiriw, klimat qadaǵalawı hám miynet sharayatları haqqında tolıq maǵlıwmatlar berildi.
Sonday-aq, qatnasıwshılar kárxananıń qoymaxanasın da kózden ótkerdi. Ol jerde ónimlerdi saqlaw sharayatları, temperatura hám ıǵallılıq rejimi, qoymaxana zıyankesleriniń aldın alıw boyınsha kórilip atırǵan ilajlar menen tanıstı. Mámleketlik fitosanitariyalıq inspektorlar tárepinen qoymaxana qadaǵalawı hám turaqlı monitoring jumısları boyınsha túsinikler berildi.
Ilaj juwmaǵında kóshpeli laboratoriya qánigeleri tárepinen alınǵan úlgilerdiń laboratoriyalıq analizleri ótkerilip, tiyisli juwmaqlar usınıldı.
Maǵlıwmat ushın, Qaraqalpaqstan Respublikasında búgingi kúnde jámi 40 subektte 88,1 gektarlıq ıssıxana bar. Sonnan 34 ıssıxana 76,5 gektar maydanda jumıs alıp baradı. Usı maydanlardıń 31,1 gektarında gidroponika, 45,4 gektarında bolsa topıraq usılında egin egiledi.
Bul ıssıxanalarda jámi 817 puqara jumıs penen bánt bolıp, sonnan 295 i turaqlı, 522 si máwsimlik jumıs orınların quraydı.
Házirgi waqıtta jumıs alıp barıp atırǵan 27 ıssıxana xojalıǵınıń 32,6 gektarında pomidor, 12,3 gektarında qıyar, 5,5 gektarında citrus hám basqa da miyweler, al 0,2 gektarında gúller tárbiyalanbaqta. Bul maydanlardan jámi 4 mıń tonnadan aslam awıl xojalıǵı ónimleriniń jetistiriliwi boljanbaqta.
Press-tur dawamında qatnasıwshılar ózlerin qızıqtırǵan sorawlarǵa juwap aldı.

Á.Jiyemuratov,
Qaraqalpaqstan xabar agentligi.
M.Habibullaevtıń túsirgen súwretleri.