Háptelik Birlesken Milletler Shólkemi Bas Assambleyasınıń 2015-jıl 22-dekabrdegi qararında belgilengen 11-fevral – Ilim tarawındaǵı hayal-qızlar xalıqaralıq kúni múnásibeti menen shólkemlestirilmekte.
Ilajlar hápteligi sheńberinde Ózbekstan Respublikası Shańaraq hám hayal-qızlar komiteti, Ilimler akademiyası, Joqarı bilimlendiriw, ilim hám innovaciyalar ministrligi sıyaqlı shólkemler menen birgelikte respublika hám aymaqlarda ilimiy-ámeliy konferenciyalar, dógerek sáwbetleri, ruwxıy-aǵartıwshılıq ilajlar, ushırasıwlar jáne hayal-qızlardıń ilimiy belsendiligin xoshametlewge qaratılǵan bir qatar baslamalar ámelge asırıladı.
Búgingi kúnde elimiz hayal-qızları ilimniń túrli tarawlarında nátiyjeli izleniwler alıp barmaqta.
Maǵlıwmatlarǵa bola, 2026-jıl yanvar jaǵdayına Ilimler akademiyası sistemasında jámi 5 mıń 243 xızmetker (2 mıń 93 hayal-qız), sonıń ishinde, 2 mıń 834 ilimiy xızmetker (997 hayal-qız), 74 akademik (5 hayal-qız), 494 ilim doktorı (117 hayal-qız), 845 ilim kandidatı hám filosofiya doktorı (272 hayal-qız) jumıs alıp barmaqta.
Sistemadaǵı 35 shólkemnen besewinde hayal direktorlar basshılıq etpekte. Ilimler akademiyası basshılıǵında 2024-jıldıń 4-aprelinen ximiya-biologiya baǵdarı boyınsha vice-prezident Shahlo Turdikulova óz jumısın basladı.
Ilimler akademiyası janındaǵı 31 ilimiy shólkem doktoranturalarında jámi 682 (382 hayal-qız) tayanısh doktorant, 68 (27 hayal-qız) doktorantlar bilim almaqta.
“Ilim hám hayal-qızlar: turaqlı jámiyetke qaray” hápteligin joqarı dárejede shólkemlestiriw hám ótkeriw maqsetinde Respublikalıq shólkemlestiriw komiteti dúzilip, tiyisli ministrlikler hám uyımlar tárepinen belgilengen reje tiykarında tayarlıq jumısları alıp barılmaqta.
Bul háptelik hayal-qızlardı ilimge keńnen tartıw, olardıń intellektuallıq potencialın júzege shıǵarıw hám turaqlı jámiyettiń rawajlanıwında hayal-qızlardıń ornın jáne de bekkemlewge xızmet etedi.

N.Usmonova, ÓzA