“Ózatom” agentliginde elimizdiń yadro medicinasın rawajlandırıw perspektivalarına baǵıshlanǵan jumısshı májilis ótkerildi.
Onda Sanaat, radiaciya hám yadrolıq qáwipsizlik komiteti, Ilimler akademiyasınıń Yadro fizikası institutı, Densawlıqtı saqlaw ministrligi, “Densawlıqtı saqlaw joybarları orayı” joybarlaw ofisi, “Radiopreparat” mámleketlik kárxanası, mámleketimizdiń jetekshi medicina mákemeleriniń basshıları, wákilleri hám “Rosatom qurılıs texnologiyaları” divizionınıń qánigeleri qatnastı.
Rossiya tárepi ushırasıwda yadro medicinası infrastrukturasın zaman talaplarına sáykes túrde rawajlandırıw tájiriybeleri menen ortaqlastı. Olar ciklotron kompleksleri, radiofarmacevtika ónimlerin islep shıǵarıw hám PET/KT diagnostika orayların shólkemlestiriw boyınsha ámeliy mısallardı usındı.
Sonday-aq, ilajda xalıqaralıq dárejede tabıslı ámelge asırılǵan tayar joybarlar tájiriybesi haqqında da sóz boldı.
Qánigelerdiń atap ótkenindey, bunday baslamalar mámleketimiz basshısı Shavkat Mirziyoev tárepinen belsene qollap-quwatlanbaqta. Tashkentte Yadro medicinası orayı joybarı baslandı. Oraydı 2026-jılı PET/KT úskeneleri, ciklotron, radiofarmlaboratoriya, gamma hám kiber-pıshaq texnologiyaları menen úskenelew názerde tutılǵan. Joybar onkologiyalıq járdem sapasın jaqsılaw, rakti erte basqıshta anıqlaw hám xalıqaralıq standartlarǵa muwapıq kadrlar tayarlawǵa xızmet etedi.
Ushırasıw juwmaqları boyınsha tárepler Ózbekstanda yadro medicinasın rawajlandırıw ushın “Jol kartası” hám strategiyanı birgelikte islep shıǵıwǵa kelisip aldı.

N.Ziyodullaeva, ÓzA