Sociallıq tarmaqlarda koronavirusqa qarsı vakcina alǵan insanlardıń ómiri qáwip astında ekeni, atap aytqanda, olar rak keselligine shalınıwı múmkin ekeni haqqında xabarlar tarqaldı.
Bul jaǵday boyınsha Sanitariyalıq-epidemiologiyalıq tınıshlıq hám jámiyet salamatlıǵı komiteti baslıǵınıń birinshi orınbasarı Nurmat Otabekov tómendegilerdi málim etti:
– Bárinen burın, bul xabarlar pútkilley tiykarsız ekenligin ayrıqsha atap ótiw kerek. Maǵlıwmatlarǵa qaraǵanda, pandemiya baslanǵannan házirgi kúnge shekem dúnya boyınsha 710 million adam usı kesellikke shalınǵan, 7 millionnan aslamı qaytıs bolǵan. Eger vakcina tabılmaǵan hám shanshıw ilajları shólkemleskenlik penen ótkerilmegeninde, bul sanlar bir neshe esege joqarı bolıwı múmkin edi. Bunı vakcina oylap tabılǵansha ótken bir jıl dawamında ólimshilik kórsetkishi joqarı bolǵanı da anıq tastıyıqlaydı.
Qánige sıpatında aytpaqshıman, qollanılǵan vakcinalar genomǵa unamsız tásir etpeydi, bul óz dálilin taptı. Durıs, vakcinanı qabıl etken ayırım adamlarda hár qıylı unamsız jaǵdaylar, máselen, dem alıw qıyınlasıwı, dene temperaturasınıń kóteriliwi hám júrektiń tez urıwı sıyaqlı belgiler baqlanǵan. Biraq bul waqtınsha bolıp, shanshılǵannan soń 2-3 kún ótip, hámmesi artta qalǵan.
Materialda onkologiyalıq kesellikler qáwpi de vakcinaǵa baylanıslı ekenligi hám shanshıwdan keyin denede payda bolǵan unamsız jaǵdaydan (qabıl etilgen vakcina) qutılıw ushın bolsa qarabas hám arıslan pánjesi shóplerinen paydalanıw usınıs etilgenligi hár bir qánigeni tań qaldıratuǵını sózsiz.
Bul tarawdan ulıwma uzaq bolǵan adamnıń pikirinen basqa nárse emes. Qarabas ayazlaw, dem alıw jolları isiniwi ushın, al arıslan pánjesi hayal-qızlarda gormonallıq jaǵdaydı turaqlı uslap turıw maqsetinde qaynatpa sıpatında paydalanıp kelingen. Sonnan kelip shıqsa, bul eki shóp vakcinadan keyin payda bolǵan immunitetke tásir kórsetiw hám joq etiw qásiyetine iye emes.
Ulıwma, pandemiya dáwirinde bir qatar vakcinalar qollanılıp, epidemiyalıq jaǵday jumsartıldı, áhmiyetlisi, dúnya boyınsha millionlaǵan insanlardıń ómiri saqlap qalındı.
Solay eken, bunday xabardı tarqatıw hám bunday maǵlıwmatlarǵa iseniwden aldın qánige menen másláhátlesiw maqsetke muwapıq, dep bilemiz.

M.Qosimova,
ÓzA