Sahıpqıran Ámir Temur atı jáhán tariyxınıń eń ullı shaxsları qatarında múnásip orın iyelep kelmekte. Ol ullı mámleketlik ǵayratker, qúdiretli sárkarda hám ilim, mádeniyat hám kórkem óner qáwenderi sıpatında adamzat civilizaciyasınıń rawajlanıwına sheksiz úles qosqan.
Onıń ádillikke tiykarlanǵan mámleketshilik ideyaları, kúshli basqarıw sisteması hám aǵartıwshılıq siyasatı búgingi kúnde de úlken áhmiyetke iye.
Áne, usı ullı insan tuwılǵanınıń 690 jıllıǵın keńnen belgilew maqsetinde Prezidenttiń tiyisli qararı qabıl etilip, mámleketimizde keń kólemli aǵartıwshılıq hám ilimiy ilajlardı shólkemlestiriw belgilendi.
Qararǵa muwapıq, bıyılǵı jılı Sahıpqıran Ámir Temur tuwılǵan kúniniń 690 jıllıǵı mámleketimiz boylap keńnen belgilenedi. Bul sáne tek ǵana tariyxıy yubiley sıpatında emes, al milliy ózlikti ańlaw, bay ruwxıy miyrastı tereń úyreniw hám onı keń jámiyetshilikke jetkeriwge qaratılǵan áhmiyetli process sıpatında qaralmaqta.
Sonday-aq, hár jılı aprel ayı “Ámir Temur aylıǵı” dep járiyalanıp, bilimlendiriw mákemeleri, ilimiy oraylar hám máhállelerde temurtanıwshı ilimpazlar, jazıwshı hám kórkem óner sheberleriniń qatnasıwında ushırasıwlar, dógerek sáwbetleri hám aǵartıwshılıq ilajlar ótkeriledi.
Qarar sheńberinde 2030-jılǵa shekem mólsherlengen arnawlı “jol kartası” tastıyıqlandı. Onda Ámir Temur hám temuriyler dáwiri miyrasın úyreniw, saqlaw hám úgit-násiyatlawǵa qaratılǵan bir qatar áhmiyetli wazıypalar belgilengen.
Atap aytqanda, 9-10-aprel kúnleri Islam civilizaciyası orayında “Ámir Temur hám temuriyler civilizaciyasınıń jáhán tariyxı hám mádeniyatındaǵı ornı hám áhmiyeti” atamasında xalıqaralıq ilimiy konferenciya shólkemlestiriledi. Bul ánjumanda hár qıylı mámleketlerden kelgen ilimpazlardıń qatnasıwında jańa izertlew nátiyjeleri dodalanıp, ilimiy birge islesiwdi bunnan bılay da keńeytiwge tiykar jaratıladı.
Sonday-aq, Ámir Temurdıń belgili “Temur túzikleri” shıǵarmasınıń ilimiy túsindirme tekstin bir qatar shet tillerde, sonıń ishinde, parsı, arab, qıtay, inglis, francuz, ispan hám rus tillerinde basıp shıǵarıw rejelestirilgen. Bul arqalı shıǵarmanıń mazmun-mánisi dúnya jámiyetshiligine jáne de keńirek jetkeriledi. Bunnan tısqarı, “Temuriyler dáwiriniń 100 siyrek ushırasatuǵın qoljazbaları” hám “Temuriyler dáwiriniń 100 siyrek ushırasatuǵın dúrdanaları” atamasındaǵı kitap-albomlar tayarlanıp, ilimiy hám mádeniy jámiyetshilikke usınıladı.
Jáne bir áhmiyetli baslamalardan biri, temuriyler dáwirine baylanıslı dereklerdi óz ishine alǵan elektron platformanı jaratıw bolıp esaplanadı. Bul platforma arqalı qoljazbalar, tariyxıy hújjetler, ilimiy maqalalar hám izertlewler elektron túrde jaylastırılıp, keń paydalanıwshılar ushın ashıq túrde usınıladı.
Sahıpqıran Ámir Temur tuwılǵan kúniniń 690 jıllıǵına baǵıshlanǵan ilajlarǵa tayarlıq kóriw hám olardı joqarı dárejede ótkeriw maqsetinde shólkemlestiriwshi komitet quramı da tastıyıqlandı. Komitet barlıq ilajlardı muwapıqlastırıw, olardıń mazmunı bay hám tásirsheń bolıwın támiyinlew menen shuǵıllanadı.
Ulıwma alǵanda, bul qarar hám rejelestirilgen ilajlar ullı babamız Ámir Temurdıń miyrasına bolǵan tereń húrmettiń ayqın kórinisi bolıp esaplanadı. Bul háreketler arqalı milliy maqtanısh sezimi bekkemlenip, jas áwlad tariyxıy estelikke húrmet hám watansúyiwshilik ruwxında tárbiyalanadı. Sahıpqıran Ámir Temur sıyaqlı ullı shaxslardıń miyrası bolsa keleshek áwlad ushın hámiyshe ilham deregi bolıp qaladı.

Muhayyo Toshqoraeva,
ÓzA