Ózbekstan Respublikası Prezidenti Shavkat Mirziyoev 5-fevral kúni mámleketlik sapar menen Islamabadqa keldi.
Pakistan hawa aymaǵında joqarı mártebeli miymannıń samolyotına usı mámleket Áskeriy hawa kúshleriniń qırıwshı samolyotları joldaslıq etti.
“Nurxon” aeroportında mámleketimiz basshısın Pakistan Prezidenti Asif Ali Zardoriy, Bas ministr Shahboz Sharif hám basqa da rásmiy shaxslar kútip aldı.
Ózbekstan Prezidenti Islamabad qalasına kelgennen soń, “Globallıq sanaat hám qorǵanıw sheshimleri” kompaniyasınıń bas rezidenciyasına barıp, Qorǵanıw kúshleri Bas sárkardası – Qurallı Kúshlerdiń qurǵaqlıqtaǵı áskerleri sárkardası, feldmarshal Asim Munir menen ushırasıw ótkerdi.
Ózbekstan menen Pakistan arasındaǵı kóp qırlı birge islesiw hám strategiyalıq sheriklik qatnasıqların jáne de rawajlandırıwdıń tiykarǵı tárepleri dodalandı.
Áskeriy hám áskeriy-texnikalıq tarawlardaǵı birge islesiwdi keńeytiw, sonday-aq, búgingi kúnde qáwipsizlikke qáwip tuwdırıp atırǵan qáwip-qáterlerge qarsı gúresiw boyınsha háreketlerdi muwapıqlastırıwǵa ayrıqsha itibar qaratıldı.
Eki mámlekettiń jetekshi qorǵanıw sanaatı kárxanaları arasındaǵı kooperaciya baylanısların jedellestiriw, áskeriy qánigelerdi tayarlaw baǵdarlamaların keńeytiw, tájiriybe almasıw hám birgeliktegi oqıw ilajların ótkeriw áhmiyetli ekenligi atap ótildi.
Transport hám logistika tarawında perspektivalı infrastrukturalıq joybarlardı ámelge asırıwdı jedellestiriw máseleleri de kún tártibinen orın aldı.
Áskeriy hám áskeriy-texnikalıq birge islesiwdi rawajlandırıw boyınsha óz aldına “jol kartası”n tayarlaw boyınsha kelisimge erisildi.
Ózbekstan Prezidenti ushırasıw juwmaǵında “Globallıq sanaat hám qorǵanıw sheshimleri” kompaniyasınıń qollanbaları, sonıń ishinde, Pakistannıń zamanagóy áskeriy texnikası hám qural-jaraq úlgileri menen tanıstı.
Mámleketimiz basshısın Islamabad qalasında ajıratılǵan rezidenciyada Pakistan Islam Respublikası Bas ministriniń orınbasarı, sırtqı isler ministri Ishoq Dor kútip aldı.
Bul jerde bolıp ótken ushırasıwda Ishoq Dor mámleketimiz basshısına ótkeriliwi rejelestirilgen eki tárepleme ilajlardıń kún tártibi haqqında maǵlıwmat berdi.
Ózbekstan Prezidenti Bas ministrdiń orınbasarınıń bul mámleketlik sapardı shólkemlestiriwge qosqan úlken úlesin ayrıqsha atap ótti.
Sapar etiw sheńberinde bolıp ótetuǵın joqarı dárejedegi sóylesiwler hám Strategiyalıq birge islesiw keńesiniń birinshi májilisi Ózbekstan – Pakistan strategiyalıq sheriklik qatnasıqların jańa ámeliy mazmun menen bayıtatuǵınına isenim bildirildi.
Bunnan soń Pakistan Bas ministriniń rezidenciyasında Ózbekstan Respublikası Prezidentin rásmiy kútip alıw máresimi bolıp ótti.
Joqarı mártebeli miyman húrmetine eki mámlekettiń mámleketlik bayraqları kóterildi hám húrmetli qarawıl sap tarttı. Mámleketlik gimnler jańladı.
Shavkat Mirziyoev hám Shahboz Sharif rásmiy delegaciyalar aǵzaların qutlıqladı.
Rásmiy kútip alıw máresiminen soń Islamabad qalasında Ózbekstan Respublikası Prezidenti Shavkat Mirziyoev hám Pakistan Islam Respublikası Bas ministri Shahboz Sharif tar sheńberde ushırasıw hám joqarı dárejedegi Strategiyalıq birge islesiw keńesiniń birinshi májilisin ótkerdi.
Mámleketimiz basshısı ushırasıw aldınan Bas ministrdi jaqınlasıp kiyatırǵan muqaddes Ramazan ayı hám Pakistan kúni bayramı menen qutlıqladı.
Joqarı dárejede erisilgen kelisimlerdi ámelge asırıw sheńberinde Ózbekstan – Pakistan strategiyalıq sheriklik hám kóp qırlı birge islesiw qatnasıqların bunnan bılay da keńeytiw hám bekkemlewdiń ámeliy tárepleri hár tárepleme dodalandı.
Keyingi jıllarda óz-ara baylanıslar jedel tús alǵanı qanaatlanıwshılıq penen atap ótildi. Siyasiy sóylesiw bekkemlenip, parlamentleraralıq hám uyımlararalıq almasıwlar jedel rawajlanbaqta.
Ótken jıldıń juwmaqlarına bola óz-ara sawda kólemi derlik 500 million dollarǵa jetti. Ózbekstanda Pakistan kapitalınıń qatnasıwındaǵı 230 ǵa shamalas kárxana jumıs alıp barmaqta. Eki mámleket arasındaǵı aviaqatnawlar kóbeydi. Bankler aralıq korrespondentlik qatnasıqlar bekkemlenbekte.
Toqımashılıq, farmacevtika, ximiya, awıl xojalıǵı hám basqa da tarawlarda kooperaciya joybarları tabıslı ámelge asırılmaqta.
Tárepler usı sapar aldınan ótkerilgen siyasiy másláhátlesiwler hám Húkimetleraralıq komissiya májilisiniń nátiyjelerin qollap-quwatladı.
Sapar etiw sheńberinde Ózbekstan sanaat ónimleriniń kórgizbesi ótkerilmekte.
Eki mámleket sırtqı isler ministrlikleri Muwapıqlastırıwshı komitetiniń birinshi májilisin jaqın kúnlerde Tashkentte ótkeriw zárúr ekenligi atap ótildi.
Isbilermen toparlar arasında uzaq múddetli birge islesiwdi ornatıw maqsetinde Ózbekstan – Pakistan Isbilermenler keńesin shólkemlestiriw boyınsha kelisimge erisildi.
Jaqın keleshekte óz-ara tovar almasıwdı 2 milliard dollarǵa jetkeriw wazıypası qoyıldı. Ámeldegi Jeńilletilgen sawda kelisimi sheńberindegi ónimlerdiń túrin, sonday-aq, Ózbekstan awıl xojalıǵı ónimleri ushın fitosanitariyalıq ruqsatnamalar dizimin bunnan bılay da keńeytiw jáne Ózbekstannıń Lahor hám Karachidaǵı sawda úylerinen belsene paydalanıw haqqında qararlar qabıl etildi.
Saparǵa tayarlıq sheńberinde awıl xojalıǵı, elektrotexnika, geologiya, farmacevtika, jeńil sanaat, azıq-awqat ónimlerin qayta islew hám basqa da tarawlarda derlik 3,5 milliard dollarlıq joybarlar portfeli qáliplestirildi.
Transport hám logistika baylanısların rawajlandırıwǵa ayrıqsha itibar qaratıldı. Transawǵan temir jolı joybarın ámelge asırıwdı jedellestiriw hám “Pakistan – Qıtay – Qırǵızstan – Ózbekstan” transport koridorın rawajlandırıw áhmiyetli ekenligi atap ótildi.
Eki mámleket aymaqlarınıń óz-ara baylanısları ekonomikalıq birge islesiwdiń rawajlanıwınıń tiykarǵı drayverlerinen biri sıpatında belgilendi.
Ózbekstan – Pakistan aymaqlararalıq forumın shólkemlestiriwge kelisip alınıp, onıń birinshi ushırasıwın usı jılı Xorezm wálayatında ótkeriw usınısı bildirildi.
Zıyarat turizmi tarawında sistemalı birge islesiwdi jolǵa qoyıw máseleleri ayrıqsha dodalandı. Eki mámleket xalıqları arasındaǵı doslıqtı bekkemlew maqsetinde usı jılı Pakistanda Ózbekstan mádeniyatı háptelikleri hám Ózbekstan kinosı kúnlerin ótkeriwge kelisip alındı.
Sonday-aq, mámleketimiz basshısı Baburiyler miyrasın úgit-násiyatlaw ushın Lahorda birgeliktegi mádeniyat orayın shólkemlestiriwdi usınıs etti.
Sóylesiwler dawamında xalıqaralıq hám regionallıq kún tártibindegi áhmiyetli máseleler boyınsha pikir alısılıp, kóp tárepleme strukturalar sheńberinde tıǵız birge islesiwdi dawam ettiriwge isenimli umtılıs bildirildi.
Juwmaǵında Shavkat Mirziyoev Shahboz Sharifti juwap saparı menen Ózbekstanǵa keliwge mirát etti.
Joqarı dárejedegi Strategiyalıq birge islesiw keńesiniń birinshi májilisinen soń Ózbekstan Respublikası Prezidenti Shavkat Mirziyoev hám Pakistan Islam Respublikasınıń Bas ministri Shahboz Sharif Birgeliktegi deklaraciyaǵa qol qoydı.
Bunnan tısqarı, jetekshiler janında tómendegi eki tárepleme hújjetlerdi almasıw máresimi bolıp ótti:
– Sırtqı isler ministrlikleri arasında 2026-2028-jıllarǵa mólsherlengen birge islesiw baǵdarlaması;
– Ózbekstan – Pakistan Isbilermenler keńesin shólkemlestiriw haqqında kelisim;
– Ózbekstan – Pakistan aymaqlararalıq forumın shólkemlestiriw haqqında shártnama;
– Jeńilletilgen sawda haqqındaǵı kelisimge jańa tovarlar dizimin kirgiziw haqqında protokol;
– Port xızmetleri hám shegirmeler usınıw tarawındaǵı birge islesiw haqqında kelisim;
– Taw-kán hám geologiya tarawındaǵı birge islesiw haqqında kelisim;
– Awıl xojalıǵı tarawındaǵı birge islesiw haqqında kelisim;
– Awıl xojalıǵı izertlewleri hám rawajlanıwı tarawındaǵı birge islesiw haqqında kelisim;
– Farmacevtika ónimlerin qadaǵalaw tarawındaǵı birge islesiw haqqında kelisim;
– Toqımashılıq hám tigiwshilik sanaatında birge islesiw haqqında kelisim;
– Sanlı hám málimleme texnologiyaları tarawındaǵı birge islesiw haqqında kelisim;
– Mádeniyat tarawındaǵı birge islesiw haqqında kelisim;
– Ullı Baburiyler dinastiyasınıń ilimiy-aǵartıwshılıq, mádeniy hám arxitekturalıq miyrasın saqlaw, úyreniw hám keńnen úgit-násiyatlaw haqqında kelisim;
– Sport tarawındaǵı birge islesiw haqqında kelisim;
– Radiciya hám yadro qáwipsizligi tarawındaǵı birge islesiw haqqında kelisim;
– Ekologiya hám tábiyǵıy apatshılıqlar tarawındaǵı birge islesiw haqqında kelisim;
– Ayrıqsha jaǵdaylardı basqarıw tarawındaǵı birge islesiw haqqında shártnama;
– Korrupciyaǵa qarsı gúresiw tarawındaǵı birge islesiw haqqında kelisim;
– Náshebentlik quralları, psixotrop hám jańa psixoaktiv elementler hám olardıń prekursorlarınıń nızamsız aylanısına qarsı gúresiw tarawındaǵı birge islesiw haqqında kelisim;
– Erkinen ayırılǵan shaxslardı jazanı ótewdi dawam ettiriw ushın tapsırıw haqqındaǵı kelisim;
– Ózbekstannan Pakistanǵa tutınıw ushın jańa úzilgen alma, ánjir, limon hám ashshı burısh eksportı ushın fitosanitariyalıq talaplar haqqında protokol;
– eki mámleket qorǵanıw ministrlikleri arasında “jol kartası.”
Sonday-aq, Ózbekstan – Pakistan ekspertler keńesin shólkemlestiriw, Ózbekstan Ekonomika hám qarjı ministrligi menen Pakistan Sanaat hám óndiris ministrligi janındaǵı Kishi hám orta biznesti rawajlandırıw basqarması, Termiz qalası hákimligi hám Peshovar qalası hákimligi, Samarqand qalası hákimligi hám Islamabad qalası hákimligi, Ózbekstan Respublikası Prezidenti janındaǵı Strategiyalıq hám regionlararalıq izertlewler institutı hám Islamabad strategiyalıq izertlewler institutı, Tashkent mámleketlik shıǵıstanıw universiteti hám Peshovar universiteti arasında birge islesiw haqqındaǵı kelisimlerge qol qoyıldı.
Strategiyalıq birge islesiw keńesiniń birinshi májilisi sheńberinde Ózbekstan Respublikası Prezidenti Shavkat Mirziyoevqa Pakistan Milliy ilim hám texnologiyalar universitetiniń húrmetli doktorı hám professorı ataqların beriw máresimi bolıp ótti.
Bas ministr Shahboz Sharif mámleketimiz basshısına bul haqqındaǵı tiyisli sertifikattı tapsırdı.
Bul ataqlar Ózbekstan jetekshisiniń sociallıq-ekonomikalıq hám bilimlendiriw tarawlarındaǵı reformalar, mámleketti izbe-iz modernizaciyalaw, ilim hám texnologiyalardı rawajlandırıw, xalıqaralıq birge islesiw hám akademiyalıq baylanıslardı bekkemlewge qosqan úlken úlesi ushın berildi.
Máresimde Shavkat Mirziyoev Pakistan Bas ministri, universitet basshılıǵı hám akademiyalıq jámiyetshiligine joqarı ataqlar ushın minnetdarshılıq bildirip, bilimlendiriw tarawındaǵı baylanıslardı bunnan bılay da bekkemlew hám joqarı mamanlıqtaǵı qánigelerdi birgelikte tayarlaw áhmiyetli ekenligin atap ótti.
1991-jılı shólkemlestirilgen Milliy ilim hám texnologiyalar universiteti ilimiy izleniwler hám innovaciyalıq jumıs, magistr hám doktorlardı tayarlaw jáne sanaat hám ekonomika talaplarına mólsherlengen ámeliy izertlewlerdi alıp barıw sıyaqlı baǵdarlardı ózinde jámlegen.
Ózbekstan Prezidentiniń Pakistanǵa mámleketlik saparı sheńberindegi ilajlardıń gezektegisi Islamabadtaǵı kóshelerden birine Tashkent hám jańadan qurılatuǵın baǵqa Zahiriddin Muhammad Babur atın beriw máresimi boldı.
Ózbekstan Prezidentiniń Pakistanǵa mámleketlik saparı sheńberindegi ilajlardıń gezektegisi Islamabadtaǵı kóshelerden birine Tashkent hám jańadan qurılatuǵın baǵqa Zahiriddin Muhammad Babur atın beriw máresimi boldı.
Bas ministr Shahboz Sharif bul qarar eki mámleket arasındaǵı jaqın tariyxıy hám mádeniy baylanıslardı sáwlelendiriwi jáne Ózbekstan – Pakistan kóp qırlı sheriklik qatnasıqlarınıń strategiyalıq dárejesin jáne bir márte tastıyıqlaytuǵının atap ótti.
Tashkent kóshesi hám ullı babamız Zahiriddin Muhammed Babur atı menen atalatuǵın jańa baǵ xalıqlarımız arasındaǵı doslıq hám miyrim-shápáát baylanısların jáne de bekkemlewge bolǵan óz-ara umtılıs isenimli ekeniniń ayqın belgisi bolatuǵını ayrıqsha atap ótildi.
Ózbekstan Respublikası Prezidenti Shavkat Mirziyoev hám Pakistan Bas ministri Shahboz Sharif Islamabad qalasında bolıp ótken Strategiyalıq birge islesiw keńesiniń birinshi májilisiniń juwmaqları boyınsha ǵalaba xabar quralları wákilleri ushın bayanat berdi.
Mámleketimiz jetekshisi sóziniń aldında Pakistanǵa mámleketlik sapar menen keliw miráti hám ótkerilgen nátiyjeli sóylesiwler ushın usı mámleket húkimetiniń basshısına minnetdarshılıq bildirdi.
Jedel rawajlanıp atırǵan Pakistan Ózbekstannıń isenimli strategiyalıq sherigi ekeni ayrıqsha atap ótildi. Pakistan Bas ministri basshılıǵında xalıqtıń abadanlıǵın arttırıw, ekonomikalıq ósiwdi jedellestiriw hám mámlekettiń xalıqaralıq abırayın bekkemlew baǵdarında ámelge asırılıp atırǵan keń kólemli reformalar Ózbekstandı quwandırıp atırǵanı aytıldı.
Sonday-aq, bul sapar etiw Ózbekstan – Pakistan strategiyalıq sheriklik qatnasıqları ornatılǵanınıń bes jıllıǵında ótkerilip atırǵanı qanaatlanıwshılıq penen atap ótildi.
Keyingi bes jılda óz-ara sawda 2,5 esege, qospa kárxanalar hám joybarlardıń sanı bolsa derlik 3 esege arttı. Jaqın keleshekte sawda aylanısın 2 milliard dollarǵa jetkeriw maqset etip qoyıldı. 3,5 milliard dollarlıq perspektivalı sawda hám investiciyalıq kelisimlerdiń portfeli qáliplestirildi.
Sóylesiwlerdiń juwmaǵında Birgeliktegi deklaraciya hám birge islesiwdiń tiykarǵı baǵdarları boyınsha 30 ǵa shamalas áhmiyetli hújjetke qol qoyıldı.
Regionallıq birge islesiwdi izbe-iz rawajlandırıw arqalı Oraylıq hám Qubla Aziyanıń óz-ara baylanıslılıǵın birgelikte bekkemlewge umtılıw isenimli ekeni bildirildi. Xalıqaralıq hám regionallıq shólkemler sheńberinde óz-ara qollap-quwatlawdı dawam ettiriwge tayarlıq atap ótildi.
Ózbekstan Prezidenti Pakistannıń mámleketimizdiń Jáhán sawda shólkemine aǵza bolıwın jedel qollap-quwatlaǵanı ushın minnetdarshılıq bildirdi. Pakistannıń 2025-2026-jıllarda BMSh Qáwipsizlik Keńesiniń waqıtsha aǵzası sıpatında tınıshlıq hám xalıqaralıq turaqlılıqtı támiyinlew baǵdarındaǵı háreketlerine joqarı baha berildi.
Farmacevtika, toqımashılıq, elektrotexnika, taw-kán hám azıq-awqat sanaatı, awıl xojalıǵı tarawlarında birge islesiwdi keńeytiw boyınsha kelisimge erisildi. Transport hám logistika baylanısların rawajlandırıw jáne biznes ushın qolaylı sharayatlar jaratıwǵa ayrıqsha itibar qaratıldı.
Aymaqlararalıq birge islesiwdi tereńlestiriw maqsetinde usı jılı Ózbekstanda birinshi Aymaqlararalıq forumdı ótkeriwne qarar etildi.
Bunnan tısqarı, birgelikte mádeniyat háptelikleri hám kinofestivallardı shólkemlestiriw, ullı oyshıllardıń ilimiy-aǵartıwshılıq miyrasın úyreniw hám ǵalaba en jaydırıw rejelestirilmekte.
Islamabad kóshelerinen birine Tashkent atı berilgeni ushın jáne bir márte minnetdarshılıq bildirildi.
Prezidentimiz, óz gezeginde, Pakistan paytaxtında ullı mámleketlik ǵayratker hám shayır Zahiriddin Muhammad Babur atındaǵı baǵdı qurıw haqqında qarar qabıl etilgenin járiyaladı. Bul Pakistan xalqına mámleket ǵárezsizligi bayramın belgilew aldınan múnásip sawǵa boladı.
Mámleketimiz jetekshisi Pakistan Milliy ilim hám texnologiyalar universitetiniń húrmetli doktorı hám professorı ilimiy ataqları berilgeni ushın Pakistan tárepine ayrıqsha minnetdarshılıq bildirdi.
Shavkat Mirziyoev shıǵıp sóylegen sóziniń juwmaǵında hámmeni bolajaq Pakistan kúni bayramı hám jaqınlasıp kiyatırǵan múbárek Ramazan ayı menen qutlıqladı.
Ózbekstan Respublikası Prezidenti Shavkat Mirziyoevtiń Pakistanǵa mámleketlik saparı dawam etpekte.

ÓzA