Qaraqalpaqstan Respublikası Salıq basqarması qánigeleriniń qatnasıwında Nókis qalasındaǵı sawda komplekslerinen birinde “Meniń salıǵım – elimniń ıǵbalı” atamasında akciya ótkerildi.
Bul akciya puqaralar arasında salıq mádeniyatın arttırıw hám tiykarǵısı, jasırın ekonomikanıń aldın alıwǵa qaratılǵanı menen áhmiyetli bolıp esaplanadı.
Akciyada qánigeler tárepinen sawda kompleksindegi háreketli ortalıq – hár bir satıp alıw, hár bir chek, hár bir sum keleshekke qoyılǵan kishi, biraq mazmunlı úles ekeni atap ótildi.
Ayırımlar ushın arzımaǵan bolıp kóringen satıp alıw chekin talap etiwdiń áhmiyeti, jasırın ekonomika, atap aytqanda, sawda túsimlerin jasırıw, salıqtan qashıw hám rásmiy emes bántliktiń unamsız aqıbetleri hám satıp alıw cheki ushın engizilgen keshbek, salıq jeńillikleri, salıqlardıń túrleri hám múddetleri haqqındaǵı sorawlarǵa durıs juwap bergen puqaralarǵa Qaraqalpaqstan Respublikası Salıq basqarmasınıń arnawlı sawǵaları tapsırıldı.

Á.Jiyemuratov,
Qaraqalpaqstan xabar agentligi.