Respublikamızda barlıq tarawlar sıyaqlı, medicina tarawında da sırt mámleketler menen birge islesiw jumısları jetilistirilip, xalıqtıń salamatlıǵın qorǵaw boyınsha zaman talapları tiykarında jańalıqlar engizilmekte.
Sonıń ishinde, sońǵı jılları Izrail mámleketiniń «MASHAV» agentligi hám Franciyanıń Les Amis Ouzbekistan shólkemleri arasında birge islesiw jumısları jedel rawajlanbaqta. Ásirese, olardıń medicina tarawında alıp barıp atırǵan keń kólemli jumıslarınıń nátiyjesinde jolǵa qoyılǵan joybarları óziniń unamlı nátiyjesin berip atır.
Usınday joybarlardıń biri Qaraqalpaqstandaǵı “Mehirli insanlar” qáwenderlik fondı tárepinen ámelge asırılıp, onda Xojeli rayonı Balalar ftiziatriya sanatoriyasında emlew denetárbiyası xanası shólkemlestirilip, kerekli úskeneler menen támiyinlendi.
Jaqında usı qordıń wákilleri sanatoriyada bolıp, nawqaslarǵa jaratılǵan imkaniyatlar menen tanısıp, olar menen sáwbetlesti. Óz gezeginde sanatoriyada emleniwshiler hám olardıń ata-anaları da bul jaratılǵan sharayatlardan kewilleri tolıp, shólkem basshılarına ózleriniń minnetdarshılıǵın bildirdi.
– Búgingi kúni sanatoriyamızda 45 bala emlenip, oqıp hám sawallandırılıp atır, – deydi Xojeli rayonı Balalar ftiziatriya sanatoriyasınıń bas shıpakeri Genjemurat Babajanov. – Bul jaratılǵan sharayatlar óz gezeginde sanatoriyamızda emlenip atırǵan balalardıń tezirek sawalıp ketiwine járdem beredi. Bunıń ushın Izrail mámleketiniń «MASHAV» agentligi hám Franciyanıń Les Amis Ouzbekistan shólkemleri hám “Mehirli insanlar” qáwenderlik fondına úlken raxmet aytaman.
– Bizler «MASHAV» agentligi menen 3 jıldan beri birge islesip kelmektemiz, – deydi Qaraqalpaqstandaǵı “Mehirli insanlar” qáwenderlik fondı baslıǵı Zamira Klıcheva. – Usı jıllar ishinde agentlik penen birgelikte respublikamızda kóplegen unamlı jumıslar ámelge asırıldı. Aldaǵı waqıtları da birge islesiwdi dawam ete beremiz.
Maǵlıwmat ushın aytatuǵın bolsaq, sanatoriyada “Mehirli insanlar” qáwenderlik fondı tárepinen balalardıń oynaw xanası Franciyanıń Les Amis Ouzbekistan shólkemi hám Emlew denetárbiyası kabineti hám Izrail mámleketiniń «MASHAV» agentligi tárepinen karjılandırıldı.

Adilbay Orazov,
Qaraqalpaqstan xabar agentligi sholıwshısı.