Mámleketimizdiń xalıqaralıq maydanda abırayı kún sayın artıp barmaqta. Turaqlı jolǵa qoyılıp atırǵan birge islesiwlerdiń nátiyjesinde siyasiy hám mádeniy sheriklerimizdiń qatarı da keńeymekte.
Bul jumıslardıń nátiyjeliligin jáne de arttırıw maqsetinde “Ózbekstan Respublikasınıń sırt mámleketler menen mádeniyat hám turizm tarawlarındaǵı baylanısların jáne de keńeytiw ilajları haqqında”ǵı Prezident pármanı (PP-15-sanlı, 30.01.2026-j.) qabıl etildi.
Pármanǵa bola, belgilengen mámleketlerdegi elshixanalardıń shtat kestesine qosımsha túrde mádeniyat hám turizm máseleleri boyınsha másláhátshisi lawazımı kirgiziliwi názerde tutılǵan.
Bul lawazım sırt ellerde Ózbekstannıń mádeniyat hám turizm tarawlarındaǵı baslamaların muwapıqlastırıw nátiyjeliligin arttırıw maqsetinde engizilgenin atap ótiw kerek.
Keńesgóy lawazımına tayınlaw hám onnan azat etiw Prezident Administraciyası Kreativ ekonomika hám turizm boyınsha departament baslıǵınıń usınısına muwapıq sırtqı isler ministri tárepinen ámelge asırılıwı belgilengen.
Keńesgóy tiyisli mámlekettegi diplomatiyalıq wákilxana basshısına boysınıp, onıń 2 tárepleme qatnasıqlardı rawajlandırıw jumısına járdemlesedi hám Prezident Administraciyası Kreativ ekonomika hám turizm boyınsha departament baslıǵına esap beredi.
Bul párman jetilisip atırǵan basqarıw sistemasınıń jáne bir úlgisi ekenin atap ótiw kerek.

Sherbek Islomov,
ÓzA