Prezident saparı
Ózbekstan Respublikası Prezidenti Shavkat Mirziyoev Túrkiya Respublikası Prezidenti Rejep Tayyip Erdoǵannıń mirát etiwine bola 29-yanvar kúni rásmiy sapar menen usı mámlekette boldı.
Kóp tárepleme sherikliktiń hár qıylı baǵdarların qamtıp alıwshı eki tárepleme hújjetler toplamına qol qoyıldı. Ekonomikalıq hám finanslıq birge islesiw, arnawlı ekonomikalıq zonalar tarawındaǵı birge islesiw haqqında da kelisimlerge erisildi.
Ózbekstan Respublikası investiciyalar, sanaat hám sawda ministriniń orınbasarı wazıypasın atqarıwshı Akram ALIEV sapar sheńberinde ótkerilgen birge islesiw ushırasıwları hám áhmiyetli hújjetlerge ayrıqsha toqtap ótti.
– Keyingi jılları Ózbekstan hám Túrkiya arasındaǵı sawda-ekonomikalıq hám investiciyalıq birge islesiw joqarı dinamika menen rawajlanıp barmaqta. 2017-jıl menen házirgi waqıttı salıstıratuǵın bolsaq, ol waqıtta Túrkiya investiciyalarınıń bahası 20 million dollarǵa da jetpeytuǵın edi. Ótken jıldıń ózinde bolsa Túrkiya kapitalınıń qatnasıwında 3,2 milliard dollarlıq investiciyalar ózlestirildi, – dedi A.Aliev.
Qospa kárxanalardıń sanı kóbeyip barmaqta. Máselen, 2025-jıldıń ózinde qospa kárxanalardıń sanı 400 ge artıp, házirgi waqıtta 2200 ge jetken. Bul, álbette, túrk kapitalınıń qatnasıwındaǵı joybarlar mámleketimizdiń hár bir aymaǵı, hár bir tarawına kirip bardı, degeni. Energetika, densawlıqtı saqlaw, jeńil sanaat, awıl xojalıǵı, qurılıs materialları sıyaqlı kóplegen baǵdarlardı óz ishine alǵan birge islesiwimiz dawam etpekte.
Mámleketimiz basshısınıń saparı sheńberinde túrkiyalı sherikler menen jańa baǵdarlarda bir qatar kelisimlerge eristik. Olar – zergerlik sanaatı, gidroenergetika, infrastruktura, qala qurılısı joybarları bolıp esaplanadı. Men oylayman, jaqın jıllar ishinde ekonomikalıq sanaattı modernizaciyalaw boyınsha jumıslarımız jańa basqıshqa shıǵadı.

Behruz XUDOYBERDIEV, Anvarxwja AHMEDOV (video), ÓzA