Ózbekstan Respublikası mádeniyat ministri, Xalıqaralıq túrkiy mádeniyat shólkemi – TÚRKSAYdıń 43-dáwirlik koordinatorı Ozodbek Nazarbekov Túrkiya Respublikasına xızmet saparı sheńberinde Ankara qalasında jaylasqan TÚRKSAY Bas sekretariatına bardı.
Mádeniyat ministrin TÚRKSAY Bas xatkeri Sultan Raev kútip aldı.
Ózbekstan Respublikası mádeniyat ministri Ozodbek Nazarbekov dáslep shólkemge aǵza mámleketlerdiń Bas sekretariatında jumıs alıp barıp atırǵan wákilleri hám xızmetkerler menen tanısıp, qızǵın sáwbetlesti.
Imarattıń foesinde shólkemlestirilgen Ózbekstannıń mádeniy-tariyxıy miyrası, dástúrleri hám qádiriyatlarına baǵıshlanǵan fotokórgizbeni kózden ótkerdi.
Bunnan keyin eki tárepleme sóylesiw ótkerildi. Ministr O.Nazarbekov ázelden tariyxı, tili hám dini, úrp-ádet hám dástúrleri, búgingi arzıw-niyetleri uqsas bolǵan tuwısqan xalıqlar arasında doslıq hám awızbirshilik qatnasıqların bekkemlewde TÚRKSAYdıń ayrıqsha ornı bar ekenin atap ótti.
Túrkiy milletlerdiń ruwxıy birligin támiyinlew, qádiriyatlardı qásterlep saqlaw hám rawajlandırıw, tariyxıy miyrastı úyreniw hám úgit-násiyatlaw, ullı ata-babalarımızdıń esteligin máńgilestiriw baǵdarında keń kólemli mádeniy-gumanitarlıq baǵdarlamalar ámelge asırılıp atırǵanına itibar qarattı.
Óz gezeginde TÚRKSAY Bas xatkeri Sultan Raev miymandı saparı menen qızǵın qutlıqlap, sońǵı jılları Ózbekstanda Prezident Shavkat Mirziyoevtiń baslaması menen mádeniyat hám kórkem óner tarawın rawajlandırıwǵa oǵada úlken itibar qaratılıp atırǵanın, TÚRKSAY jumısı sheńberindegi birge islesiw baylanısları da jańa basqıshqa kóterilgenin atap ótti.
Ózbekstanda mádeniyat hám kórkem ónerge baǵıshlanǵan abıraylı xalıqaralıq ilajlar, forumlar, festivallar joqarı dárejede ótkerilip atırǵanı, shólkem sheńberindegi ózine tán kórkem óner bayramları, kórgizbeler, ilimiy-aǵartıwshılıq ánjumanlar, túrkiy tiller hám ádebiyatlardıń rawajlanıwına baǵıshlanǵan xalıqaralıq konferenciyalarda mámleketimiz wákilleriniń belsene qatnasıp atırǵanın joqarı bahaladı.
TÚRKSAY Bas sekretariatında Ózbekstan wákili jumıs baslaǵanı óz-ara birge islesiwdi bekkemlewde úlken áhmietke ie ekenin atap ótti.
Sóylesiw dawamında Ózbekstan Prezidenti TÚRKSAY jumısın rawajlandırıw boyınsha áhmiyetli usınıslardı alǵa qoyıp kiyatırǵanı haqqında sóz boldı. Sonıń ishinde, 2025-jıl 21-may kúni Budapesht qalasında bolıp ótken Túrkiy mámleketler shólkeminiń rásmiy emes sammitinde Ózbekstan Prezidenti Shavkat Mirziyoev TÚRKSAYdıń abırayın jáne de arttırıw ushın onıń jumısı hám strukturasın zaman talaplarına sáykes túrde jetilistiriw zárúr ekenligin atap ótken edi.
Usı tiykarda ótken jılı 7-oktyabrde Ázerbayjan Respublikasınıń Gabala qalasında ótkerilgen Túrkiy mámleketler shólkemi Mámleket basshıları keńesiniń 12-májilisinde “TÚRKSAYdı rawajlandırıw hám bekkemlew haqqında”ǵı qarar qabıl etildi. Házirgi waqıtta TÚRKSAY Bas sekretariatı usı qarardıń orınlanıwın támiyinlew maqsetinde aǵza mámleketler menen birgelikte jedel jumıs alıp barmaqta.
Bizge belgili, TÚRKSAY Turaqlı keńesiniń qararı menen hár jılı túrkiy mámleketlerdegi qalalardan biri “Túrkiy dúnyanıń mádeniyat paytaxtı” dep járiyalanadı hám sol mámlekettiń mádeniyat ministri jıl dawamında TÚRKSAYdıń dáwirlik koordinatorı esaplanadı. Yaǵnıy, tikkeley shólkemniń jumısına basshılıq etedi hám barlıq processlerdi muwapıqlastırıp baradı.
2026-jılı Ándijan qalası “Túrkiy dúnyanıń mádeniyat paytaxtı” dep járiyalanǵan. Ózbekstan Respublikası mádeniyat ministri Ozodbek Nazarbekov bolsa usı jılı TÚRKSAYdıń 43-dáwirlik koordinatorı bolıp esaplanadı.
Qızǵın ruwxta ótken ushırasıwda bolajaq ilajlarǵa puqta tayarlıq kóriw hám keleshektegi birge islesiwdi bunnan bılay da bekkemlew boyınsha pikir-usınıslar bildirildi.

N.Usmonova, ÓzA