Kadastr agentligi Qaraqalpaqstan Respublikası basqarmasında baspasóz konferenciyası ótkerildi.
Onda Kadastr agentligi Qaraqalpaqstan Respublikası basqarması baslıǵınıń orınbasarı P.Seytmuratov hám Mámleketlik kadastrlar palatası Qaraqalpaqstan Respublikası basqarması baslıǵınıń orınbasarı G.Turdıbaevlar kadastr tarawında 2025-jıl dawamında ámelge asırılǵan jumıslar haqqında keń túrde maǵlıwmat berdi.
Atap ótilgenindey, Kadastr agentligi hám Mámleketlik kadastrlar palatası Qaraqalpaqstan Respublikası basqarması, qalalıq hám rayonlıq bólimleri tárepinen ótken jıl dawamında jerden nızamsız paydalanıw jaǵdayların qadaǵalaw jumısları alıp barılıp, respublikamız boyınsha 4211 jaǵdayda, jámi 371,7 gektarlıq jer nızamsız iyelengeni anıqlanǵan. Sonnan jámi 242,2 gektarlıq jerge iye 2605 jaǵday boyınsha túsinik jumısları alıp barılıp, bul jerler hákimliklerdiń jer rezervlerine qaytarıldı. Sonday-aq, 39,2 gektarlıq jer maydanına iye 675 jaǵday boyınsha sudlarǵa dawa arzaları kirgizildi. Bunnan tısqarı, 44 jaǵday boyınsha toplanǵan hújjetler Prokuratura uyımlarına jiberildi. Qalǵan jaǵdaylar boyınsha tiyisli ilajlar dawam ettirilmekte.
2025-jıl dawamında puqaralar tárepinen 1189 jaǵdayda 683 gektarlıq jerden maqsetsiz paydalanıp kelingeni anıqlanıp, 1189 jaǵdaydı Respublikalıq jer qorına qaytarıw ushın hákimliklerge hújjetler usınılıp, sonnan 671 gektar jer maydanı mámleketlik jer qorına qaytarıldı.
“Ózbasımshalıq penen iyelep alınǵan jer uchastkaları jáne olarda qurılǵan imarat hám obektlerge bolǵan huqıqlardı tán alıw haqqında”ǵı Nızamǵa tiykarlanıp 2024-2025-jılları 228 máhállede xatlaw jumısların ámelge asırıw rejelestirilgen edi. Usı jumıslar dawamında 154661 kóshpes múlk obekti xatlawdan ótkerilip, búgingi kúnge shekem 2039 puqaranıń jerge hám múlkke bolǵan huqıqı tán alındı.
2025-jılı kelip túsken arzalarǵa tiykarlanıp 90449 kóshpes múlkke bolǵan huqıq mámleketlik dizimnen ótkerildi. Al, isbilermenlik hám qala qurılısı ushın 20,35 gektar maydanda 231 jer uchastkası hám jeke tártipte turaq jay qurıw ushın 8 372 jer uchastkası aukcionda realizaciyalandı.
Baspasóz konferenciyası dawamında qatnasıwshılar, kóp qabatlı turaq jaylardıń arasında qurılǵan kommerciyalıq obektlerdiń nızamlılıǵı, múlkti kadarstr arqalı rásmiylestiriwdiń tártip-qaǵıydaları hám basqa da máseleler boyınsha ózlerin qızıqtırǵan sorawlarǵa juwap aldı.

Á.Jiyemuratov,
Qaraqalpaqstan xabar agentligi