Taxtakópir rayonı hákimi Jambul Adilov Qıtay Xalıq Respublikasınıń “Hangzhou Hua Yi Technology Company” Ltd kompaniyası wákillerinen ibarat isbilermenler delegaciyası menen ushırasıw ótkerdi.
Onda Ózbekstan Respublikası Sanlı texnologiyalar ministrliginiń Qaraqalpaqstan Respublikası aymaqlıq sektorı baslıǵı Timur Baekeev hám tiyisli taraw juwapkerleri qatnastı.
Ushırasıw dawamında rayon hákimi Jambul Adilov kompaniya wákilleri menen Taxtakópir rayonı aymaǵında ámelge asırılıwı rejelestirilip atırǵan qospa investiciyalıq joybarlar boyınsha sóylesiwler alıp bardı. Sóylesiw barısında rayon hákimi rayonda sırt el investorları ushın jaratılıp atırǵan qolaylı sharayatlar, investiciyalıq joybarlardı hár tárepleme qollap-quwatlaw mexanizmleri haqqında toqtap ótti. Atap aytqanda, Qıtay delegaciyası tárepinen maǵlıwmatlar orayın (Data Center) shólkemlestiriw, quyash paneli stanciyasın qurıw hám jasıl energetika baǵdarındaǵı joybarlardı ámelge asırıw boyınsha usınıslar bildirildi. Bul joybarlar aymaqta sanlı infrastrukturanı rawajlandırıw, alternativ energiya dereklerinen nátiyjeli paydalanıw hám jańa jumıs orınların jaratıwda úlken áhmiyetke iye ekeni atap ótildi.
Ushırasıw juwmaǵında tárepler óz-ara birge islesiwdi jáne de rawajlandırıw, joybarlardı basqıshpa-basqısh ámelge asırıw boyınsha keleshektegi ámeliy qádemlerdi belgilep alıwǵa kelisip aldı.

Qaraqalpaqstan xabar agentligi