Kásiplik bilimlendiriwdiń sapasın hám nátiyjeliligin arttırıw, jaslardıń miynet bazarında óz ornın tabıwına jaqınnan járdemlesiw, oqıw orınlarındaǵı ruwxıy-aǵartıwshılıq ortalıqtı bunnan bılay da salamatlandırıw búgingi kúnde oǵada áhmiyetli bolıp esaplanadı.
Ózbekstan Respublikası Prezidenti Administraciyası basshısınıń orınbasarı Hilola Umarova basshılıǵında kásiplik bilimlendiriwdi rawajlandırıw hám sistemada kadrlar potencialın arttırıw máselelerine baǵıshlanǵan keńeytilgen májilis bolıp ótti.
Onda Mektepke shekemgi hám mektep bilimlendiriwi ministrligi, Joqarı bilimlendiriw, ilim hám innovaciyalar ministrligi, Kásiplik bilimlendiriw agentligi, sistemadaǵı shólkemlerdiń basshıları, ministrlik hám Agentliktiń aymaqlıq bólimleriniń juwapkerleri qatnastı.
Óz-ara sóylesiw túrinde ótkerilgen ushırasıwda kásip-óner bilimlendiriwin rawajlandırıw hám ámeliy kónlikpelerge tiykarlanǵan dual bilimlendiriw sistemasın jetilistiriw, kásiplik bilimlendiriw sistemasında kadrlar potencialın arttırıw hám sırt el birge islesiw baǵdarlamaların keńeytiw máseleleri dodalandı.
Sonıń menen birge, tabıslı texnikumlardıń jumısın mámleket kóleminde ǵalabalıq en jaydırıw, usı jılı Prezident sıylıǵı ushın texnikum oqıwshıları arasında ótkeriliwi rejelestirilgen “Kásiplik sheberlik” milliy tańlawın joqarı dárejede shólkemlestiriw, texnikumlarǵa “til iyeleri” bolǵan sırt el qánigeleri tartıw boyınsha áhmiyetli wazıypalar belgilep alındı.
Májiliste belgilengen bul rejelerdi izbe-iz ámelge asırıwda Mektepke shekemgi hám mektep bilimlendiriwi ministrligi jáne Kásiplik bilimlendiriw agentliginiń aymaqlıq bólimleri birgelikte jumıs alıp baratuǵını atap ótildi.
Ilaj dawamında ministrlik hám Agentliktiń aymaqlıq bólimleri basshılarınıń májilis kún tártibindegi máseleler boyınsha esabatları tıńlandı.

N.Usmonova,
ÓzA