Qaraqalpaqstan Respublikası Ádillik ministrliginde ǵalaba xabar quralları wákilleriniń qatnasıwında baspasóz ánjumanı bolıp ótti.
Oǵan ministrliktiń juwapker basshıları hám ǵalaba xabar qurallarınıń xızmetkerleri qatnastı.
Onda Qaraqalpaqstan Respublikası Ádillik ministriniń birinshi orınbasarı Amangeldi Prenov 2025-jıl dawamında ministrlik tárepinen ámelge asırılǵan jumıslar haqqında keń túrde maǵlıwmatlar berildi
– Ministrliktiń tiykarǵı wazıypalarınan biri birden-bir mámleketlik huqıqıy siyasattı júrgiziw, norma dóretiwshiligi jumısların muwapıqlastırıw, mámleketlik hám xojalıq basqarıw, jergilikli mámleketlik hákimiyatı uyımları jumıslarında huqıqtı qollaw ámeliyatın turaqlı hám birdey támiyinlew boyınsha ilajlardı ámelge asırıw bolıp tabıladı, – deydi Amangeldi Prenov. – Bul baǵdarda ministrlik tárepinen ótken jıl dawamında bir qatar jumıslar ámelge asırıldı. Atap aytqanda, fizikalıq hám yuridikalıq shaxslardan ministrlik hám rayon (qala) ádillik bólimlerine jámi 5 045 múrájatlar kelip túsip, sonnan 2 779 múrájat qanaatlandırıldı hám múrájat iyeleriniń huqıqları tiklendi. Sonıń ishinde, sudlarǵa jámi summası 7 mlrd 151 mln sumnan artıq 1 361 dana dawa arzaları kirgizilip, puqaralardıń huqıqları sud tárepinen tikleniwine erisildi.
– Ministrlikke kelip túsken múrájatlar analizlengende múrájatlardıń basım kópshiligin miynet , turaq-jay, sociallıq qorǵaw, mámleketlik xızmetler kórsetiw hám puqaralıq halatı aktlerin jazıw tarawları menen baylanıslı ekenligin kórsetpekte, – deydi Qaraqalpaqstan Respublikası Ádillik ministrliginiń huqıqıy málimleme sektorı baslıǵı Nuriya Berdiniyazova. – Bunnan tısqarı, “ijro.gov.uz” sisteması arqalı Qaraqalpaqstan Respublikası Ministrler Keńesi hám aymaqlardaǵı mámleketlik organlar hám shólkemlerine kelip túsken tapsırmalardıń orınlanıwı hár ayda tallawdan ótkerilip, nátiyjesi boyınsha tiyisli sharalar kóriw ushın Qaraqalpaqstan Respublikası Joqarǵı Keńesine usınıs retinde jiberilmekte. Anıqlanǵan nızam buzılıwı jaǵdayları hám olardı saplastırıw boyınsha ministrlik tárepinen mámleketlik uyımlar hám shólkemlerde nızamshılıqtıń durıs tártipke salınıwı ústinen turaqlı túrde monitoring alıp barılmaqta.
Ótkerilgen ánjumanda ministrlik tárepinen atap ótilgen maǵlıwmatlar hám búgingi kúni keń jámiyetshilikti qızıqtırıp júrgen máseleler boyınsha jurnalistler tárepinen sorawlar berilip, olarǵa tiyisli juwaplar aldı.

Adilbay Orazov,
Qaraqalpaqstan xabar agentligi sholıwshısı.