Amerika Qurama Shtatları paytaxtı Vashington qalasında Ózbekstan texnikalıq jaqtan tártipke salıw agentliginiń direktorı Akmal Jumanazarov Amerika Milliy standartlar institutı (ANSI) vice-prezidentleri Jozef Tretler hám Meri Saunders penen ushırasıw ótkerdi.
Ózbekstan Respublikası Sırtqı isler ministrligi hám Ózbekstannıń AQShtaǵı elshixanası menen birgelikte shólkemlestirilgen bul ushırasıwda Ózbekstan hám Amerika Qurama Shtatları arasında standartlastırıw hám akkreditaciya tarawlarındaǵı birge islesiw qatnasıqlarınıń búgingi jaǵdayı hám onı bunnan bılay da rawajlandırıw perspektivaları hár tárepleme dodalandı.
Ushırasıw dawamında standartlastırıw hám akkreditaciya tarawında birge islesiw kólemin keńeytiw, milliy texnikalıq komitetlerdiń jumısın jetilistiriw, Xalıqaralıq standartlastırıw shólkemi (ISO) hám Xalıqaralıq elektronika komissiyası (IEC) texnikalıq komitetlerinde Ózbekstannıń qatnasıwın jáne de jedellestiriw, xalıqaralıq standartlardı milliy ámeliyatqa engiziw, sonday-aq, taraw ushın maman kadrlar tayarlaw máselelerine ayrıqsha itibar qaratıldı.
AQSh tárepi Ózbekstannıń “S5+1” formatı sheńberinde Oraylıq Aziya hám AQSh arasındaǵı birge islesiwdegi belsene qatnasıwı, ISO hám IEC sheńberindegi háreketleri, Globallıq sapa infrastrukturası indeksinde mámleket reytinginiń 52-orınǵa kóterilgeni, tarawǵa sanlastırıw processleriniń izbe-iz engizilip atırǵanı hám Jáhán sawda shólkemine aǵza bolıw processleriniń jedelleskenin unamlı bahaladı.
Sonday-aq, Ózbekstan standartlar institutı strukturasındaǵı Sawdadaǵı texnikalıq tosqınlıqlar boyınsha málimleme orayınıń jumısın jetilistiriw, sanlı hám jasalma intellekt texnologiyaların engiziw, qánigelerdi AQShta tájiriybe arttırıwǵa jiberiw, milliy nızamshılıqtı JSSh kelisimleri hám normalarına muwapıqlastırıw, sawdadaǵı texnikalıq tosqınlıqlardı saplastırıw jáne AQSh bazarına shıǵıwda standart talapları boyınsha trening hám seminarlar ótkeriw boyınsha kelisimlerge erisildi.
Ushırasıw juwmaǵında Amerika Milliy standartlar institutı (ANSI) hám Ózbekstan texnikalıq jaqtan tártipke salıw agentligi arasında standartlastırıw tarawındaǵı birge islesiwdi bunnan bılay da rawajlandırıwǵa qaratılǵan birge islesiw baǵdarlamasına qol qoyıldı.
Maǵlıwmat ushın: Amerika Milliy standartlar institutı 1918-jılı shólkemlestirilgen bolıp, xalıqaralıq standartlastırıw sistemasında jetekshi orındı ieleydi. ANSI ISO sheńberindegi 560 texnikalıq komitet jumısında tolıq huqıqlı aǵza, 8 texnikalıq komitette baqlawshı sıpatında qatnasadı hám 93 texnikalıq sekretariattı basqaradı. Globallıq sapa infrastrukturası indeksine bola, AQSh 186 mámleket arasında ekinshi orındı iyelep, metrologiya hám akkreditaciya baǵdarlarında jetekshi poziciyalardı atap ótken.

ÓzA