“Ózgidromet” Ózbekstan aymaǵına suwıq anticiklon kirip kiyatırǵanınan eskertti.

Mámleket aymaǵına suwıq anticiklon kirip kelmekte. Bul process basqıshpa-basqısh boladı hám anticiklon kirip keliw dáwirinde atmosferada hawa almasıwı hálsireydi.
Nátiyjede, atmosfera hawasında pataslandırıwshı zatlar hám mayda bólekshelerdiń (PM2,5/PM10) toplanıwı baqlanıwı múmkin, bul bolsa hawanıń pataslanıw kórsetkishleriniń artıwına alıp keledi. Bul process 3 kún dawamında saqlanıp turadi.
Keyin ala anticiklonnıń tásiri kúsheyip baradı hám 16-17-yanvar kúnlerine kelip respublika boylap derlik barlıq aymaqlarda hawa temperaturası tómenleydi. Kúndizgi temperaturalar da tómenlep, túngi hám azanǵı saatlarda suwıq kúsheyedi.
Sonıń menen birge, anticiklon nátiyjesinde jawın-shashın bolıwı da boljanbaqta. Ayırım aymaqlarda jawın yamasa qar kórinisindegi qısqa múddetli jawın-shashınlar baqlanadı.
Jawın-shashınlar hám samal nátiyjesinde atmosferada toplanǵan mayda bóleksheler juwılıwı hám atmosfera hawası sapasınıń jaqsılanıwına bir qansha waqıt sebep bolıwı kútilmekte.

Qaraqalpaqstan xabar agentligi