Ózbekstan Respublikası Prezidenti Shavkat Mirziyoev usı jıldıń 26-dekabr kúni Oliy Majlis hám Ózbekstan xalqına Múrájatında “Ózbekstan – 2030” strategiyasın qayta kórip shıǵıw wazıypasın atap kórsetti.

2023-jılı qabıl etilgen bul baǵdarlamalıq hújjet barlıq taraw hám tarmaqlarda úlken nátiyjelerge tiykar bolıp kelmekte. Kámbaǵallıq dárejesi 11 procentten 6,8 procentke, jumıssızlıq 6,8 procentten 4,9 procentke tústi. Jalpı ishki ónim kólemi 103 milliard dollardan 145 milliard dollarǵa jetti. Eksport kólemi 25 milliard dollardan 33,4 milliard dollarǵa, sırt el investiciyalarınıń kólemi 17 milliard dollardan 43 milliard dollarǵa arttı. Sırt el turistleriniń sanı 6,6 millionnan 8,6 millionǵa, mektepke shekemgi bilimlendiriwge qamtıp alıw 72 procentten 78 procentke, joqarı bilimlendiriwge qamtıp alıw 42 procentke, Ózbekstan menen diplomatiyalıq qatnasıqlar ornatqan mámleketlerdiń sanı 144 ten 164 ke jetti.
Sonıń menen birge, keyingi eki jılda Ózbekstan Respublikası Prezidentiniń 650 den aslam párman hám qararı qabıl etildi. Mámleketimiz basshısı tárepinen 500 den aslam hár qıylı dárejedegi májilis, ushırasıw hám prezentaciyalarda barlıq tarawlar boyınsha jańa wazıypalar qoyıldı.
Máselen, eki jıl aldın 2030-jılǵa shekem jalpı ishki ónimimizdiń kólemin 160 milliard dollarǵa jetkeriw maqseti qoyılǵan edi. Endi bul shekke 2026-jıldıń ózinde erisiliwi kútilmekte. Múrájatta kelesi bes jılda ekonomikamızdıń kólemin 240 milliard dollardan arttırıw imkaniyatı bar ekenligi atap ótildi. Yaǵnıy, elimizde barlıq tarawlarda joqarı shekler alınıp atır.
Sonday-aq, 2023-jılı xalqımızdıń sanı 36,7 milliondı quraǵan bolsa, bul kórsetkish 2030-jılǵa barıp 41 millionǵa shekem artıwı prognoz etilmekte. Hár bir jańa maqsetti usı ósiwdi esapqa alıp belgilew de áhmiyetli.
Bunnan tısqarı, jáhán ekonomikası hám xalıqaralıq qatnasıqlarda tendenciyalar hám dinamika ózgermekte. Sanlı texnologiyalar hám jasalma intellekt, xalıqtıń talapları da jańa qádemlerdi, anıq rejelerdi kún tártibine qoymaqta.
Usı ózgerisler hám nátiyjelerdi esapqa alıp, “Ózbekstan – 2030” strategiyasınıń jetilistirilgen joybarı islep shıǵıldı. Bul baǵdarda juwapker ministrlikler hám uyımlar jáne ilimiy oraylardıń 350 den aslam wákiliniń qatnasıwında Strategiyadaǵı barlıq 444 nátiyjelilik kórsetkishi búgingi kún kózqarasınan qayta kórip shıǵıldı.
Sonıń ishinde, “Ózbekstan – 2030” strategiyası joybarı bir qatar tárepleri menen áhmiyetli:
birinshiden, barlıq kórsetkishler mámleketimiz basshısı tárepinen belgilep berilgen jańa sheklerge beyimlestirildi hám tolıqtırıldı. Onda, watanlaslarımızǵa múnásip sharayat jaratatuǵın, hár bir insan hám shańaraq turmısında seziletuǵın maqsetlerge ayrıqsha itibar qaratıldı;
ekinshiden, barlıq kórsetkishler ólshenetuǵın, yaǵnıy, san túrinde (procent, úles, dáreje, kólem, qatnas, ball, indeks) bolıwı qatań belgilendi. Esaplap shıǵıw yamasa bahalaw múmkin bolmaǵan, ulıwma wazıypa, tapsırma hám “súren” kórinisindegi kórsetkishler shıǵarıp taslandı (bunday bántler 130);
úshinshiden, barlıq nátiyjelilik kórsetkishleriniń orınlanıwı 2030-jılǵa shekem jıllıq etip belgilendi. Yaǵnıy, hár bir unamlı ózgeristi jıllar kesiminde kóriw imkaniyatı jaratıldı;
tórtinshiden, Strategiyada hár bir ministrlik hám uyım óz ornın taptı. Atap aytqanda, joybarǵa bola, 60 qa shamalas mámleketlik uyımlarǵa tiyisli nátiyjelilik kórsetkishi belgilendi;
besinshiden, hár bir nátiyjelilik kórsetkishine erisiliwin támiyinleytuǵın finanslıq derekler anıq kórsetildi;
altınshıdan, endi taraw, tarmaq hám aymaqlardı rawajlandırıw koncepciyaları menen strategiyaları “Ózbekstan – 2030” strategiyasına muwapıq halda islep shıǵılatuǵını qatań belgilenedi. Sonıń ishinde, kelesi jılı 50 den aslam usınday koncepciya (4), taraw hám tarmaqlardı rawajlandırıw strategiyaları (38) jáne hár bir aymaqtı rawajlandırıw strategiyaların (14) qabıl etiw rejelestirilgen.
Ulıwma, Strategiyadaǵı nátiyjelilik kórsetkishlerine erisiw barlıq dárejedegi shólkemlerdiń eń tiykarǵı wazıypası esaplanadı.
Ózbekstan Respublikası Prezidentiniń tapsırmalarına muwapıq, elimizdiń kelesi bes jıllıq rawajlanıwına baylanıslı bul hújjet keń jámiyetshiliktiń dodalawınan ótkerilip, xalqımızdıń pikir-usınısları tiykarında jetilistiriledi.
Soǵan bola, Strategiya joybarı búgin uzbekistan2030.uz hám regulation.gov.uz platformalarında jámiyetshiliktiń dodalawına qoyıldı. Márhámat, dodalawǵa belsene qatnasıp, pikir bildiriń.

ÓzA