Samarqand mámleketlik veterinariya medicinası, sharwashılıq hám biotexnologiyalar universitetiniń Nókis filialında studentler arasında hár jılı ótkeriliwi úrdiske aylanǵan “Filial malikası” tańlawı bolıp ótti.

Bul ilaj jas qızlar ushın dóretiwshilik qábiletin hám saxna mádeniyatın kórsetiw jáne jeke sheberligin bahalaw imkaniyatın beredi.
Tańlawdı filial direktorınıń hayal-qızlar máseleleri boyınsha másláhátshisi Z.Dawletova kiris sóz benen ashıp, hámmeni jaqınlasıp kiyatırǵan Jańa jıl bayramı menen qızǵın qutlıqladı hám qatnasıwshılarǵa áwmet tiledi.
Atap ótilgenindey, bunday ilajlar studentlerdiń dóretiwshilik potencialın arttırıwı hám ózin kórsetiwi ushın áhmiyetli saxna esaplanadı.
Qatnasıwshılar úsh tiykarǵı shárt boyınsha bahalandı.
Jámi 6 qız jeńimpazlıq ushın gúresken bolsa, tóreshiler quramınıń bahaları tiykarında 2-kurs, 206-topar studenti S.Bazarbaeva “Filial malikası” tajına múnásip, dep tabıldı. Sonday-aq, qalǵan qatnasıwshı qızlarǵa ayrıqsha nominaciyalar boyınsha diplomlar tapsırıldı.
Tańlaw studentlerdiń jańa jıl bayramı ruwxında óz qábiletin kórsetiwi hám jeke potencialın rawajlandırıwı ushın áhmiyetli imkaniyat boldı. Sonıń menen birge, bunday ilajlar filialda mádeniy ortalıqtı joqarılatıp, jaslardıń dóretiwshilik hám kásiplik potencialın qollap-quwatlaydı.

Qaraqalpaqstan xabar agentligi