Ózbekstan Respublikası Prezidenti Shavkat Mirziyoev 21-dekabr kúni Sankt-Peterburg qalasında Joqarı Evraziya ekonomikalıq keńesiniń gezektegi májilisinde baqlawshı mámleket basshısı statusında qatnastı.

Belarus Respublikası Prezidenti Aleksandr Lukashenkonıń basshılıǵında bolıp ótken ushırasıwda Armeniya Respublikası Bas ministri Nikol Pashinyan, Qazaqstan Respublikası Prezidenti Qasım-Jomart Toqaev, Qırǵız Respublikası Prezidenti Sadir Japarov hám Rossiya Federaciyası Prezidenti Vladimir Putin de qatnastı. EAEA baqlawshı mámleketleriniń basshıları – Kuba Respublikası Prezidenti Migel Dias-Kanel hám Iran Islam Respublikası Prezidenti Masud Pezeshkiyan qatnasıwshılarǵa videomúrájat jolladı. Ilajda mirát etilgen mámleket wákili sıpatında Indoneziya Respublikasınıń sawda ministri Budi Santoso qatnastı.
Kún tártibinen kóp tárepleme sawda-ekonomikalıq birge islesiwdi jáne de keńeytiw, sanaat kooperaciyası joybarların qollap-quwatlaw, transporttı rawajlandırıw hám óz-ara birge islesiwdiń tiykarǵı baǵdarlarında birgeliktegi baǵdarlamalardı ámelge asırıw máseleleri orın aldı.
Ózbekstan Prezidenti sóziniń basında EAEA mámleketleri menen óz-ara paydalı birge islesiwdi bunnan bılay da keńeytiw mámleketimiz sırtqı ekonomikalıq siyasatınıń tiykarǵı baǵdarlarınan biri ekenin atap ótti.
Keyingi tórt jılda baqlawshı mámleket statusındaǵı birge islesiw dáwirinde Ózbekstannıń awqam mámleketleri menen tovar almasıw kólemi derlik eki esege arttı hám 20 milliard dollarǵa shamalastı.
Sawda, sanaat, qarjı sisteması, awıl xojalıǵı, transport hám basqa da tarawlarda 40 qa shamalas ilajlardı óz ishine alǵan Evraziya ekonomikalıq komissiyası menen 2026-jılǵa shekemgi birge islesiw rejesi sistemalı túrde ámelge asırılmaqta. Kelesi jılı birgeliktegi Jumısshı topardıń besinshi májilisin Tashkentte ótkeriw rejelestirilgen.
Ózbekstan sawda hám júk tasıwdı sanlastırıw, elektron kommerciyanı engiziw hám klimattıń ózgeriwine qarsı gúresiw tarawlarında EAEAnıń bir qatar tarmaq baǵdarlamalarında belsene qatnaspaqta.
Joqarı Evroaziya ekonomikalıq keńesiniń bul retki májilisi sheńberinde Ózbekstan hám EAEA arasında bajıxana shegaraları arqalı ótkerilip atırǵan tovarlar hám transport quralları haqqındaǵı maǵlıwmattı almasıw haqqında kelisim dúziw boyınsha sóylesiwlerdi baslaw haqqında qarar qabıl etildi.
– Shegaralararalıq maǵlıwmatlar almasıwı bajıxana qadaǵalawınıń nátiyjeliligin arttırıwǵa, keshigiwlerdi azaytıwǵa hám transport sistemalarımızdı Evraziya koridorlarına integraciyalawǵa xızmet etetuǵınına isenemiz, – dep atap ótti mámleketimiz basshısı.
Ózbekstan Prezidenti Evraziya ekonomikalıq awqamı menen óz-ara paydalı birge islesiwdiń tiykarǵı baǵdarlarına ayrıqsha toqtap ótti.
Atap aytqanda, mámleketimiz basshısı óz-ara tovar almasıwda sawda tosqınlıqların basqıshpa-basqısh saplastırıw áhmiyetli ekenligin atap ótti. Texnikalıq jaqtan tártipke salıw, sanitariyalıq hám fitosanitariyalıq standartlarǵa qatnaslardı úylestiriw ushın ǴMDA hám EAEA institutlarınıń jumısın muwapıqlastırıwdı kúsheytiw zárúr ekenligi kórsetip ótildi. Usı mánide, Ózbekstan jetekshisi artıqsha tártip-qaǵıydalardı saplastırıw hám talaplardı birdey etiw boyınsha “jol kartası”n islep shıǵıw usınısın bildirdi.
Texnikalıq jaqtan tártipke salıw, sertifikatlastırıw hám bajıxana hákimshiligindegi ayırmashılıqlar menen baylanıslı máselelerdi jedel sheshiw ushın tarif hám tarif emes tosqınlıqlar boyınsha “Ózbekstan – EAEA ” birgeliktegi Muwapıqlastırıwshı toparın shólkemlestiriw usınısı alǵa qoyıldı.
Sanaat tarawındaǵı birge islesiwdi jáne de keńeytiw maqsetinde mámleketimiz basshısı mashina qurılısı, energetika, agrosanaat kompleksi, ximiya hám basqa da tarawlardaǵı joybarlardıń dizimin birgelikte dúziwdi usınıs etti.
Ózbekstannıń Evraziya rawajlanıw bankine qosılıwı múnásibeti menen birge islesiwdiń strategiyalıq baǵdarların birgelikte belgilew hám tiykarǵı infrastrukturalıq hám “jasıl” joybarlardı, kishi hám orta biznesti qollap-quwatlawdı qamtıp alǵan “jol kartası”n islep shıǵıw baslaması bildirildi.
Sanlı texnologiyalar tarawındaǵı birge islesiwdi rawajlandırıw haqqında sóz etip, Ózbekstan Prezidenti bajıxana hákimshiligin sanlastırıw hám júk tasıwda “úzliksiz” modelge ótiw máseleleri tiykarǵı wazıypa ekenin atap ótti.
– Sanlı platformalardı, sonıń ishinde, elektron sawda hám sanlı markirovkanı úylestiriw boyınsha “jol kartası”n EAEA menen birgelikte tayarlawdı usınıs etemiz,-dedi Ózbekstan Prezidenti.
Ózbekstan EAEAnıń, bárinen burın, biomedicina, jańa materiallar, agrotexnologiyalar, energetika hám robototexnika baǵdarlarındaǵı texnologiyalıq platformalarına qosılıwdan mápdar.
Turizm almasıwın xoshametlew hám turistlik ónimlerdiń óz-ara baylanıslılıǵın támiyinlew maqsetinde mámleketimiz basshısı Ózbekstan turizm tarawında integraciyalasqan málimleme resursın qáliplestiriw jumıslarına da qosılıwǵa tayar ekenin bildirdi.
Juwmaǵında mámleketimiz basshısı Ózbekstan Evraziya ekonomikalıq awqamı menen keń kólemli hám óz-ara paydalı sheriklikti keńeytiwge isenimli umtılatuǵının jáne bir márte tastıyıqladı.
Rossiya Federaciyasına ámeliy sapar sheńberinde N.A.Rimskiy-Korsakov atındaǵı Sankt-Peterburg mámleketlik konservatoriyasında Ózbekstan Respublikası Prezidenti Shavkat Mirziyoev, Qırǵız Respublikası Prezidenti Sadir Japarov hám Tájikstan Respublikası Prezidenti Emomali Rahmonǵa Lev Tolstoy atındaǵı Xalıqaralıq tınıshlıq sıylıǵın tapsırıw máresimi bolıp ótti.
Rossiya Federaciyası Prezidenti Vladimir Putin janında xalıqaralıq sıylıqtı onıń kollegiya baslıǵı, Mariinskiy teatrınıń kórkemlik basshısı hám bas direktorı, Rossiya Úlken teatrınıń bas direktorı, dirijyor Valeriy Gergiyev tapsırdı.
Úsh mámleket jetekshileri bul abıraylı sıylıqqa Oraylıq Aziya regionında tınıshlıq hám qáwipsizlikti bekkemlewge qosqan úlken jeke úlesi ushın miyasar boldı.
Tóreshiler quramınıń qararında atap ótilgenindey, 2025-jıl 31-mart kúni Xojand qalasında úsh mámleket basshıları Mámleketlik shegaralardıń tutasqan noqatı haqqındaǵı shártnama hám Máńgi doslıq haqqındaǵı Xojand deklaraciyasına qol qoydı hám sol arqalı xalıqaralıq huqıq ústinligine tiykarlanǵan ulıwma hám teńdey qáwipsizlikti támiyinlew, xalıqlar arasında óz-ara kelisim hám birge islesiwdi bekkemlewge úlken úles qostı.
Bul sıylıq insanıylıq ideyalarına sadıqlıqtı sáwlelendiriwi hám Oraylıq Aziyanı tınıshlıq, abadanlıq jáne dóretiwshilik mákanına aylandırıw jolındaǵı ulıwma úlesiniń tán alınıwı ekeni atap ótildi. Dos Ózbekstan, Qırǵızstan hám Tájikstan arasındaǵı qatnasıqlarda jańa bet ashılǵanı úsh mámleket xalıqlarınıń siyasiy erk-ıqrarı, óz-ara isenim hám jaqsı qońsıshılıqqa umtılıwı sebepli bolǵanı atap ótildi.
Ózbekstan Respublikası Prezidenti Shavkat Mirziyoevtiń Rossiya Federaciyasına ámeliy saparı dawam etpekte.

ÓzA