Búgingi kúnde dúnya kóleminde millionlaǵan insanlar miynet migrantı sıpatında jumıs alıp barmaqta. Olardıń huqıqları menen máplerin qorǵaw máselesi xalıqaralıq kólemde úlken áhmiyetke iye.

Usı múnásibet penen 2000-jılı Birlesken Milletler Shólkemi Bas Assambleyasınıń 55/93-sanlı rezolyuciyasına muwapıq, 18-dekabr – Xalıqaralıq migrantlar kúni etip belgilengen. Bul sáne miynet migraciyası tarawın jetilistiriw, migrantlardıń huqıqların támiyinlew, sonday-aq, mámleketlerdiń bul baǵdardaǵı juwapkershiligin arttırıwǵa qaratılǵan.
Bizge belgili, ózbekstanlı puqaralar da bir qatar sırt ellerde miynet etiwdi ámelge asırmaqta. Ózbekstan Respublikası Oraylıq banki Tólem balansı departamenti direktorınıń orınbasarı Azizbek Hayitovtıń málim etiwinshe, 2025-jıldıń yanvar-sentyabr aylarında Ózbekstannan 2 million 360 mıń miynet migrantı sırt elge shıqqan. Bul kórsetkish 2024-jıldıń usı dáwirine salıstırǵanda 4 procentke joqarı.
Keyingi jılları mámleketimizde xalıqtıń bántligin támiyinlew, jańa jumıs orınların jaratıw, sol arqalı miynet migraciyasın qısqartıwǵa qaratılǵan keń kólemli reformalar ámelge asırılmaqta. Sonıń menen birge, sırt elde miynet etip atırǵan watanlaslarımızdıń huqıqları menen máplerin qorǵaw maqsetinde bir qatar mámleketler menen birge islesiw baylanısları bekkemlenbekte.

Sherbek Islomov, ÓzA