Ózbekstan Respublikası Prezidenti Shavkat Mirziyoev 17-dekabr kúni Koreya Respublikası hám Oraylıq Aziya mámleketleri parlamentleri basshılarınıń úshinshi ushırasıwında qatnasıw ushın elimizge kelgen Koreya Respublikası Milliy Assambleyasınıń Spikeri U Von Shik basshılıǵındaǵı delegaciyanı qabılladı.

Ushırasıw aldınan joqarı mártebeli miyman mámleketimiz basshısına Koreya Respublikası Prezidenti Li CHje Myonnıń qızǵın sálemin hám eń jaqsı tileklerin jetkerdi.
Ózbekstan hám Koreya Respublikası arasındaǵı ayrıqsha strategiyalıq sheriklikti, sonıń ishinde, parlamentlerdiń birge islesiwi arqalı bunnan bılay da rawajlandırıw máseleleri dodalandı.
Siyasiy hám parlamentleraralıq baylanıslar jedelleskeni qanaatlanıwshılıq penen atap ótildi. Tovar almasıw kólemi hám Koreyadan, birinshi gezekte, ekonomikanı modernizaciyalaw hám joqarı texnologiyalı sanaat tarmaqların rawajlandırıwǵa qaratılıp atırǵan investiciyalardıń sanı artıp barmaqta.
Gumanitarlıq hám bilimlendiriw almasıwları keńeymekte. Ózbekstanda Koreya jetekshi universitetleriniń tórt filialı, sonday-aq, mámleketimiz aymaqlarındaǵı professional bilimlendiriw orayları tabıslı jumıs alıp barmaqta.
Infrastrukturanı rawajlandırıw, transport hám logistika, siyrek ushırasatuǵın metallar hám oǵada áhmiyetli shiyki zattı qayta islew, sonday-aq, nızam dóretiwshiligi jumısın sanlastırıw hám basqarıwda aldınǵı sheshimlerdi engiziw boyınsha kooperaciyalıq joybarlardı ámelge asırıw qollap-quwatlandı.
Parlamentleraralıq birge islesiw baǵdarlamasın islep shıǵıw hám parlamentlerdegi “doslıq toparları” jumısın jedellestiriw áhmiyetli ekenligi atap ótildi.
Bolajaq joqarı dárejedegi ilajlardıń, sonıń ishinde, “Oraylıq Aziya – Koreya Respublikası” sammiti sheńberindegi kún tártibin puqta tayarlaw zárúr ekenligi atap ótildi.

ÓzA