Tashkent qalası hám 15 tájiriybe-sınaq aymaǵında basqıshpa-basqısh engizilip atırǵan “Elektron recept” sisteması jámiyetshilik hám taraw qánigeleriniń dıqqat orayında bolıp tur.

Kelip túsip atırǵan múrájat hám usınıslardı inabatqa alǵan halda, payda bolıp atırǵan sorawlarǵa anıqlıq kirgiziw hám jańa sistemaǵa turaqlı ótiwdi támiyinlew maqsetinde Densawlıqtı saqlaw ministrligi tárepinen qosımsha shólkemlestiriw hám túsindiriw jumısları ámelge asırılmaqta.
Ministrlikte mámleketlik hám jeke menshik medicina shólkemleriniń jetekshi shıpakerleri, tiyisli uyımlardıń wákilleri hám taraw ekspertleriniń qatnasıwında ushırasıw ótkerildi.
Bul haqqında ministrliktiń baspasóz xızmeti xabar bermekte.
Konstruktivlik sóylesiw dawamında “Elektron recept” sistemasın engiziwge baylanıslı máseleler, sonday-aq, bul baǵdarda medicina xızmetkerleriniń tájiriybesin hám nawqaslardıń talapların esapqa alǵan halda ayırım tártip-qaǵıydalardı bunnan bılay da jetilistiriw boyınsha usınıslar dodalandı.
Sistema qánigeleri arasında turaqlı qarım-qatnastı támiyinlew maqsetinde Densawlıqtı saqlaw ministrligi janında Ekspertler keńesin shólkemlestiriw haqqında qarar qabıl etildi. Hár hápteniń juma kúni medicina hám farmacevtika tarawı wákilleri hám basqa da tiyisli qánigelerdiń qatnasıwında usı Keńestiń ashıq májilisleri ótkeriledi.
Ushırasıw sheńberinde “Elektron recept” sistemasınıń ámeldegi islew mexanizmleri boyınsha da túsinik berildi.
Atap ótilgenindey, jeke menshik medicina shólkemleri hám shıpakerlerdiń “Elektron recept” moduline jalǵanıwı biypul bolıp, onıń ushın +998 (71) 202-50-00 nomerine múrájat etiw kerek.
Sonday-aq, sóylesiwde recept (sonıń ishinde, elektron recept) ti jazıw tek ǵana shıpaker wákilligine kiretuǵını ayrıqsha atap ótildi.
Nawqaslardı emlewdiń úzliksizligin támiyinlew maqsetinde, belgili bir medicina mákemesinde zárúr dári-dármaq bolmaǵan jaǵdaylarda, shıpaker recept jazıp beredi. Tiyisli maǵlıwmatlardı rásmiylestiriw hám elektron sistemaǵa kirgiziw bolsa dárixana mákemesiniń farmacevti tárepinen ámelge asırıladı.
Atap ótilgenindey, puqara dárixanaǵa múrájat etkende, dári quralı farmacevt tárepinen elektron recept, QR-kodlı hújjet yamasa JShShIR tiykarında beriledi.
Sırt el puqaraları bolsa elektron recept alıw ushın ulıwma shártlerde mámleketlik medicina mákemelerinde dizimnen ótiw huqıqına iye.
Densawlıqtı saqlaw ministrligi janında xalıqtı qollap-quwatlaw maqsetinde kúni-túni isleytuǵın 1003 qısqa sanlı “Sall-oray” jumıs alıp barmaqta. Puqaralar ol arqalı “Elektron recept” sistemasına baylanıslı barlıq máseleler boyınsha másláhát hám túsinikler alıw imkaniyatına iye.
Jataq rejimindegi nawqaslar, sonday-aq, sozılmalı keselliklerge shatılǵan shaxslar másláhát hám elektron recept alıw ushın óz shańaraqlıq shıpakerine telefon arqalı múrájat etiwi múmkin. Eger nawqas shańaraqlıq shıpakeriniń telefon nomerin bilmese, oǵan 1003 qısqa sanlı “Sall-oray” arqalı zárúr járdem kórsetiledi.
Medicina qánigeleri hám ekspertlerdiń qatnasıwındaǵı dodalawlar juwmaǵında bildirilgen pikir-usınıslardı esapqa alǵan halda, ámelge asırılıp atırǵan mexanizmlerdi bekkemlew hám anıqlastırıw, “Elektron recept” sistemasın engiziwdiń keyingi basqıshpa-basqısh tártibin belgilew maqsetinde Densawlıqtı saqlaw ministriniń tiyisli buyrıǵı qabıl etildi.
Oǵan bola:
1) Tashkent qalası hám 15 tájiriybe-sınaq rayonları (qalaları) aymaǵında “Elektron recept” sisteması basqıshpa-basqısh engizilip, shıpaker tárepinen dári qurallarınıń xalıqaralıq patentlenbegen ataması boyınsha elektron receptler rásmiylestiriledi hám elektron sistemaǵa kirgiziledi;
2) zárúr texnikalıq imkaniyatlar bolǵanda, medicina hám farmacevtika shólkemleri DMED málimleme sistemasına biypul jalǵanadı jáne olardıń málimleme sistemaları Densawlıqtı saqlaw ministrliginiń sanlı platformasına integraciyalanadı;
3) “Elektron recept” sisteması tiykarında beriletuǵın dári qurallarınıń dizimi basqıshpa-basqısh qáliplestirilip, onda ayrıqsha dizimler sociallıq qáwip-qáter hám tarawda júzege keletuǵın talaplardan kelip shıqqan halda hár bir basqıshta Ekspertler keńesi tárepinen tayarlanadı hám tastıyıqlanadı;
4) sistemalı tásir etetuǵın antibiotikler, sintetikalıq antibakterial preparatlar hám gormonal dári quralları ushın elektron recept májbúriy bolıwın názerde tutatuǵın birinshi basqısh belgilenedi;
5) shıpakerdiń elektron receptlerdi jazıw boyınsha wákillikleri, sonıń ishinde, belgili bir medicina shólkeminde joq bolǵan dári quralların tayınlaw hám keyin ala dárixanalardıń farmacevtleri tárepinen bul maǵlıwmattı sistemaǵa kirgiziwdiń huqıqıy tiykarları bekkemlenedi;
6) dárixanalarda receptli dári quralların elektron recept tiykarında beriw (sonıń ishinde, nawqastıń JShShIR arqalı) tártibi belgilenedi, qalaberdi, sistema tolıq engizilgenge shekem hám ayrıqsha jaǵdaylarda burınǵısınan basqasha tárizde qaǵaz kórinisindegi receptlerdi rásmiylestiriw imkaniyatı saqlap qalınadı;
7) nawqas yamasa onıń wákilinde elektron recept bolmaǵan jaǵdayda, dárixana farmacevtikasına shaxstı tastıyıqlawshı hújjet tiykarında (qaǵaz yamasa elektron formada) JShShIRdi kirgizip, sistema arqalı elektron recept penen tanısıw hám recept boyınsha dári quralın beriw huqıqın beriwshi mexanizm belgilenedi;
8) elimiz hám sırt el puqaralarınıń medicinalıq járdem hám dári quralların alıw (sonıń ishinde, qıstawlı jaǵdaylarda) huqıqları támiyinlenedi, sonday-aq, sistemanı engiziw basqıshları hám dári qurallarınıń dizimleri haqqında xalıq rásmiy derekler arqalı xabardar etip barıladı;
9) turaqlı túsinik jumısları hám qayta baylanıs sisteması, sonıń ishinde, kúni-túni isleytuǵın 1003 “Sall -orayı”nıń jumısı jolǵa qoyılıp, ol arqalı:
– jataq rejimindegi hám sozılmalı keselliklerge shatılǵan nawqaslardıń óz shańaraqlıq shıpakerine múrájat etiwi;
– shańaraqlıq shıpakerge (tiyisli jaǵdayda taraw qánigelerine) aralıqtan turıp múrájat etken halda elektron recept alıwı;
– kórsetpeler bolǵanda, patronaj xızmetiniń shólkemlestiriliwi hám zárúr medicinalıq xızmetler úyde kórsetiliwi támiyinlenedi;
10) emlewshi shipakerdiń qararına muwapıq, sozılmalı keselliklerge shatılǵan nawqaslarǵa:
– 60 kúnge shekem emleniw dáwirinde – Xalıqaralıq kesellikler klassifikaciyasına muwapıq kodlanatuǵın, sozılmalı keselliklerdi emlewde tayınlanatuǵın, sonday-aq, anabolik aktivligi menen ajıralıp turatuǵın dári quralları ushın;
– 90 kúnge shekem emleniw dáwirinde – basqa tayar dári quralları ushın (reimbursaciya sheńberinde – 30 kúnge shekem) receptler jazıwdıń ayrıqsha tártibi belgilenedi.
Bul jaǵdaylarda elektron recept hám tiyisli QR-kodtıń ámel etiw múddeti belgilengen emlew kursı dáwirine muwapıq sozdırıladı.
“Elektron recept” sisteması, bárinen burın, emlew qáwipsizligin arttırıw, dári-dármaqlardı tayınlawda juwapkershilikti kúsheytiw hám olardıń aylanısın tártipke salıwǵa qaratılǵan. Bul sistema turaqlı monitoring tiykarında puqaralar hám medicina xızmetkerleriniń pikir-usınısların esapqa alǵan halda basqıshpa-basqısh engizilmekte.

ÓzA