Rásmiy sapar menen Ózbekstanda bolıp turǵan Paragvay Respublikası Prezidenti Santyago Penya Tashkent qalasındaǵı Islam civilizaciyası orayına bardı.

Joqarı mártebeli miymandı Ózbekstan Respublikası investiciyalar, sanaat hám sawda ministri Laziz Qudratov basqarıp bardı.
Prezident Shavkat Mirziyoevtiń baslaması menen qurılǵan bul oray islam civilizaciyasınıń biybaha ilimiy-ruwxıy miyrasın saqlaw, úyreniw hám keń jámiyetshilikke jetkeriwdi maqset etken tariyxıy-aǵartıwshılıq kompleks bolıp esaplanadı.
Dárgay milliy arxitekturalıq usıl menen zamanagóy imaratlar texnologiyasın úylestirgen halda qurılǵan. Imarattıń tórt tárepinde 34 metrlik esikler, oraylıq bóliminde bolsa 65 metr biyikliktegi milliy usıldaǵı gúmbez boy tiklegen.
Santyago Penya oraydaǵı Quranı kárim zalında da bolıp, musılman dúnyasında joqarı áhmiyetke iye bolǵan Usman Mushafi – Qurannıń eń áyyemgi qoljazbalarınan biri menen tanıstı. Bul biybaha qoljazbanıń Islam dini hám jáhán mádeniyatınıń rawajlanıwındaǵı ornı ayrıqsha atap ótildi.
Sonday-aq, Paragvay delegaciyası “Islamǵa shekemgi civilizaciyalar”, “Birinshi Renessans”, “Ekinshi Renessans” hám “Jańa Ózbekstan – Jańa Renessans” ekspoziciyaları menen de tanıstı. Olarda Imam Buxariy, Imam Termiziy, Abu Mansur Maturidiy, Bahauddin Naqshband sıyaqlı ullı oyshıllarımızdıń miyrası, sonday-aq, samaniyler, qaraxaniyler, xorezmshahlar hám temuriyler dáwirlerine baylanıslı biybaha qoljazbalar da kórsetilgen.
Prezident Santyago Penya bul kompleks xalıqaralıq ilimiy-izertlew, bilimlendiriw hám mádeniy birge islesiw ushın jańa imkaniyatlar jaratatuǵının atap ótti.
Mádeniy qarım-qatnas hám ruwxıy jaqınlıqtı bekkemlew búgingi globallıq sharayatta hár qashanǵıdan da áhmiyetli ekeni ayrıqsha atap ótildi. Bul mámleketler arasındaǵı birge islesiwdi kúsheytiwde áhmiyetli faktor ekeni aytıldı.
Ózbekstanda tariyxıy miyrastı saqlaw, úyreniw hám úgit-násiyatlaw baǵdarında ámelge asırılıp atırǵan keń kólemli jumıslarǵa joqarı baha berildi.

Ikrom AVVALBOEV,
Otabek MIRSOATOV (súwret),
ÓzAnıń xabarshıları