Ózbekistan ǵárezsizlikke erisken dáslepki jılları xalıqtıń ózligin, oniń ruwxıy miyrasın, qádiriyatların hám mámleketshilik dástúrlerin qayta tiklew, bekkemlew dáwiri boldı. 1992-jıl 10-dekabrde “Ózbekstan Respublikasınıń Mámleketlik gimni haqqında”ǵı nızam qabıl etilgeni de áne usınday processtiń logikalıq dawamı bolıp esaplanadı. Bul sáne tek ǵana mámleketlik belginiń tastıyıqlanıwı emes, al pútkil xalıqtıń ózine tán ruwxıy oyanıwı, ǵárezsiz mámleketlik belgilerdiń tolıq qáliplesiwinde áhmiyetli basqısh bolıp xızmet etti.

1991-1992-jıllar Ózbekstan ushın tariyxıy sınaqlar dáwiri boldı. Ǵárezsiz mámleket sıpatında xalıqaralıq maydanǵa shıǵıw, milliy máplerdi qorǵaw, jańa konstitutsiyalıq dúzimdi qáliplestiriw, mámleketlik basqarıwdı qayta qurıw processleri bolıp atırǵan bir waqıtta simvollar máselesi ayrıqsha orın iyeledi.
Mámleketlik gimnler kóp jaǵdaylarda pútkil millettiń ruwxıy portreti, onıń idealların sáwlelendiriwshi kórkem-muzıkalıq tımsal wazıypasın atqaradı. Ózbekstan gimni de bunnan shette qalmaydı.
Gimndegi mazmun bárinen burın ózbek xalqınıń kóp ásirlik tariyxına ımlaydı. Bul tariyx áyyemgi civilizaciyalar, ullı mádeniyat hám ilim jetiskenlikleri, dańqlı mámleketshilik dástúrleri menen tıǵız baylanıslı.
Barlıq milliy nıshanlar sıyaqlı, gimnimiz de jas áwladtı Watanǵa sadıqlıq, onıń rawajlanıwına úles qosıw, birlik hám tınıshlıqtı qádirlew ruwxında tárbiyalaydı.
Gimnde bildirilgen ideyalar Ózbekstannıń búgingi rawajlanıw baǵdarlarına únles halda dúnyaǵa ashıqlıq, jaslarǵa imkaniyat beriw, rawajlanıwǵa umtılıw hám xalıqaralıq maydandaǵı belsendi poziciya menen sáwlelendirilgen.
Mámleketlik gimn tek ǵana siyasiy yamasa ruwxıy belgi emes, al jámiyetti ruwxıy jaqtan birlestiriwshi kúshli qural bolıp esaplanadı. Ol rawajlanıw hám jeńis minutlarında, sport arenalarında, xalıqaralıq maydanlarda, bilimlendiriw mákemelerinde, saltanatlı máresimlerde jańlap, xalıqtı bir maqsetke shaqıradı.
10-dekabr – Ózbekstan mámleketlik gimni qabıl etilgen kún milliy ózlik hám ǵárezsizliktiń eń ayqın belgilerinen birin esletedi. Bul sáne bizge nıshanlarımızdı húrmet etiw, ondaǵı mánis hám ideyalardı ańlaw juwapkershiligin esletedi.
Milliy gimnimiz tek ǵana muzıkalıq shıǵarma emes, al millettiń ruwxıy tımsalı, keleshekke qaray isenimli qádem taslawǵa iytermeleytuǵın kúsh. Ol elimizdiń dańqın ulıǵlaydı, xalqımızdıń birligi, maqtanıshı hám mártligin dúnyaǵa kórsetedi. Áne sol sebepli ol bárqulla eń joqarı saxnalarda, eń abıraylı maydanlarda jańlap turıwı pútkil xalıqtıń jaqsı tilegi bolıp esaplanadı.

Dildora DWSMATOVA, ÓzA