Prezident Shavkat Mirziyoev sociallıq-ekonomikalıq reformalar processleri menen tanısıw hám keleshektegi wazıypalardı belsendilerdiń qatnasıwında belgilep alıw ushın 4-dekabr kúni Sırdárya wálayatına bardı.

Mámleketimiz basshısı saparınıń birinshi mánzili Sırdárya rayonındaǵı “River Med Pharm” kárxanası boldı.
Bul kárxana mámleketimizde infuzion dári quralların islep shıǵarıw boyınsha jetekshilerden biri bolıp esaplanadı. Házirgi waqıtta Ózbekstanda islep shıǵarılıp atırǵan infuzion eritpelerdiń 20 procenti mine usı kárxanaǵa tuwra keledi.
Bunday dári quralları nawqastıń ómiri ushın eń áhmiyetli medicinalıq ónimlerdiń biri bolıp esaplanadı. Olardı tayarlaw ápiwayı tabletkalar islep shıǵarıwdan ádewir quramalı. Sebebi bul túrdegi eritpeler tikkeley qan tamırlarına jiberiledi. Demek, olar pútkilley steril sharayatta, joqarı anıqlıq hám xalıqaralıq standartlarǵa tolıq juwap beretuǵın halda islep shıǵarılıwı shárt.
Joybardıń ulıwma bahası 30 million dollardan aslam bolıp, házirgi kúnde kárxanada 750 adam turaqlı jumıs penen támiyinlengen. Kárxana jılına 135 milliard sumlıq 70 túrdegi, ulıwma esapta 114 million dana dári quralların islep shıǵarmaqta. Ónimlerdiń 20 procenti eksport etilip atırǵanı kárxananıń xalıqaralıq básekige shıdamlılıǵın kórsetedi.
Noyabr ayında joybardıń ekinshi basqıshı iske qosılıp, óndirislik quwatlıqlar jáne de keńeytildi. Kárxana 30 million dana infuzion eritpeler, 70 million danadan aslam qurǵaq antibiotikler hám derlik 20 million dana kóz-murın tamshıların islep shıǵaradı.
Mámleketimiz basshısına kárxananıń ónimleri hám gezektegi rejeleri haqqında maǵlıwmat berildi.
Keleshekte kárxanada islep shıǵarılatuǵın ónim túrleri 200 ge jetkeriledi. Bul basqıshta shiyshe hám plastik ıdıslardaǵı inekciya ushın eritpeler, sonday-aq, tabletka hám kapsulalar islep shıǵarıw jolǵa qoyıladı. Jumıs orınlarınıń sanı mıńǵa shekem arttırıladı.
Prezidentimiz bul jerde wálayattıń belsendileri hám nuranıylar menen sóylesti.
Ekonomika, sanaat, awıl xojalıǵı, jaslar tárbiyası hám aymaqtıń keleshegine baylanıslı áhmiyetli máseleler boyınsha ashıq sáwbet boldı. Mámleketimiz basshısı adamlardaǵı intakerlik reformalardıń nátiyjesin arttırıwda sheshiwshi faktor ekenin atap ótti.
– Ózgerisler, bárinen burın, máhállelerde seziliwi kerek. Sizler adamlar menen turaqlı baylanısta bolıp, jaslarǵa durıs jol kórsetiwińiz zárúr. Hámmemiz oyaw hám belsendi bolsaq, háreketlerimiz, alıp barıp atırǵan reformalarımız álbette nátiyje beredi. Sırdáryaǵa úlken rejeler menen kelgenbiz. Sizlerdi tıńlap, másláhátlesip bul rejelerdi ámelge asıramız, – dedi mámleketimiz basshısı.
Prezident Shavkat Mirziyoev “Sırdárya” erkin ekonomikalıq zonasında jumıs alıp barıp atırǵan “Invest Asia” kárxanasında boldı.
Kárxana qadaqlaw ónimlerin islep shıǵarıw boyınsha Oraylıq Aziyada jetekshilerden biri bolıp esaplanadı. Házirgi waqıtta ishki bazardaǵı polipropilen qalta hám jumsaq konteynerlerdiń 60 procenti, stretch plyonkalardıń 40 procenti usı kárxananıń úlesine tuwra kelmekte.
Kompleks 60 gektar maydanda qurılǵan bolıp, házirgi waqıtta 2,5 mıńǵa shamalas jumıs ornı jaratılǵan.
Qadaqlaw ónimleri azıq-awqattan baslap, farmacevtika, sanaat, qurılıs hám turmıslıq ximiyaǵa shekemgi kóplegen tarawlar ushın zárúr. Olardıń sapası ónimniń qáwipsiz saqlanıwı, transportirovka etiliwi hám bazarǵa óz waqtında jetkeriliwine tikkeley tásir etedi. Sonıń ushın da bunday ónimlerdi ózimizde islep shıǵarıw import qárejetlerin azaytadı, ishki bazar turaqlılıǵın támiyinleydi hám islep shıǵarıwshılar ushın qárejetlerdi sezilerli qısqartadı.
“Invest Asia” kárxanasınıń jáne bir áhmiyetli tárepi onıń mámlekette bioaksal baǵdarlanǵan polipropilen plyonka islep shıǵaratuǵın birden-bir kárxana ekeni bolıp esaplanadı. Bul plyonka túri eń ǵalabalıq qadaqlaw materiallarınan biri bolıp, qattılıǵı hám jeńilligi menen ajıralıp turadı.
Usı jıldıń on ayında kárxanada 1,9 trillion sumlıq ónim tayarlanǵan, 23 million dollarlıq eksport ámelge asırılǵan. Avstriya, Germaniya, Italiya, Qıtay hám AQSh sıyaqlı mámleketlerde islep shıǵarılǵan joqarı texnologiyalı úskenelerden paydalanılmaqta.
Prezidentimiz kárxanada ámelge asırılıp atırǵan texnologiyalıq processlerdi kózden ótkerdi, jumısshılar menen sóylesti. Keleshektegi rejeler menen tanıstı.
Sonday-aq, jıldıń aqırına shekem bul jerde Oraylıq Aziyadaǵı eń iri spanbond hám meltblaun – toqıma emes gezleme islep shıǵarıw quwatlıqlarınıń iske qosılıwı kútilmekte. Bunday gezlemeler medicina, qurılıs, turmıslıq ximiya hám awıl xojalıǵında keńnen qollanıladı.
Barlıq joybarlar tolıq quwatlılıqqa shıqqannan soń, jumıs orınlarınıń sanı 10 mıńǵa jetiwi, polimerdi qayta islew quwatlılıǵı 280 mıń tonnaǵa shekem artıwı kútilmekte.
Mámleketimiz basshısı bul jerde wálayatta iri joybarlardı ámelge asırıp atırǵan hám jańa baslamalar menen shıǵıp atırǵan sırt elli investorlar menen de sóylesiw ótkerdi. Aymaqtıń ekonomikası, xalıqtıń bántligi hám turmıs dárejesin arttırıwǵa xızmet etetuǵın hár bir joybar mámleket tárepinen, álbette, qollap-quwatlanatuǵını atap ótildi.
Investorlar mámleketimizdegi isbilermenlik hám investiciyalıq ortalıqtı joqarı bahalap, biznes ushın jaratılǵan keń imkaniyatlar hám ámeliy járdem ushın mámleketimiz basshısına minnetdarshılıq bildirdi.
Mámleketimiz basshısı Sırdárya wálayatına saparı dawamında Gúlistan qalası Bostan máhállesinde ámelge asırılǵan dóretiwshilik jumısların barıp kórdi.
Bostan máhállesi usı jılı abat máhállege aylandı. Aymaqtaǵı barlıq kóp qabatlı turaq jaylar ońlandı, aymaq abadanlastırıldı. Máhálle orayınıń jańa imaratı paydalanıwǵa tapsırıldı.
Prezident dáslep usı jerde máhálle belsendileri, nuranıylar hám jaslar menen qızǵın pikirlesti. Ushırasıwda mámlekettiń barlıq aymaqlarında tómengi buwındaǵı mashqalalardı sheshiw, máhállelerdi abat etiw hám xalıqtıń turmıs sharayatın jaqsılawǵa qaratılǵan reformalardıń nátiyjesi Sırdáryada da óz kórinisin tawıp atırǵanı atap ótildi.
– Máhálle – jámiyettiń júzi. Mámlekettegi barlıq ózgerisler, bárinen burın, usı jerde óz kórinisin tabadı. Biz sonday sistema jarattıq, burın áhmiyetli dep esaplaǵan kóplegen máselelerimizge sheshimdi máhálleniń ózinde tawıp atırmız. Bul institutqa itibardı jáne de kúsheytiwdi dawam ettiremiz, – dedi Prezidentimiz.
Aymaqtaǵı 48 kóp qabatlı jay aǵımdaǵı ońlandı, sırtqı tárepi bazalt penen qaplandı. Íssılıq támiynatın jaqsılaw maqsetinde 18 milliard sum esabınan zamanagóy qazanxana hám 3,3 kilometr ıssılıq tarmaqları qurıldı.
Kóp qabatlı turaq jaylarda 23 jeke ıssılıq punktleri ornatılıp, “jabıq” sistema shólkemlestirildi. Jergilikli byudjet qarjıları esabınan aymaqtaǵı 800 kvartiralı 20 kóp qabatlı jaydıń ishki ıssılıq sistemaları qayta tiklendi. 1 baqsha oraylasqan ıssılıq energiyası hám ıssı suw menen támiyinlendi.
Jańa qazanxananıń qurılısı nátiyjesinde 144 mıń kilovatt-saat elektr hám 627 mıń kub metr tábiyǵıy gaz únemlenedi.
Prezidentimiz kóp qabatlı turaq jaylarda jasaytuǵın xalıq ushın qolaylı sharayat jaratıwǵa qaratılǵan bul jumıslardı dawam ettiriw, qazanxanalardı qurıw hám olardan paydalanıwda zamanagóy texnologiyalardı qollanıw, maman qánigelerdi tartıw boyınsha zárúr kórsetpeler berdi.
Usı jerdiń ózinde “jetilik” wákilleri hám nuranıylar menen máhálle hám wálayat turmısında bolıp atırǵan ózgerisler haqqında sáwbet boldı.
Ózbekstan Respublikası Prezidentiniń Sırdárya wálayatında infrastrukturanı rawajlandırıwǵa baylanıslı qararı tiykarında aymaqta 215 kóp qabatlı jaydı qamtıp alǵan arnawlı mánzilli dizim qáliplestirilgen. Bul hújjet sheńberinde turaq jaylardıń tóbe hám fasad bólimlerin ońlaw, ıssılıq támiynatın, injenerlik kommunikaciya tarmaqların jaqsılaw hám qorshaǵan ortalıqtı abadanlastırıw jumısları rejelestirilgen.
Prezident Shavkat Mirziyoev Respublikalıq qıstawlı medicinalıq járdem ilimiy orayınıń Sırdárya wálayatlıq filialına bardı.
Bul jerde eki kún aldın Gúlistan qalasındaǵı ulıwma awqatlanıw shaqapshalarınan birinde gaz ballonınıń jarılıwı aqıbetinde jaraqat alǵanlar emlenbekte.
Oraydıń basshıları hám shıpakerler Prezidentimizge nawqaslardıń jaǵdayı hám emlew processleriniń barısı haqqında málimleme berdi. Mámleketimiz basshısı baxıtsız hádiyse waqtında túrli dárejede dene jaraqatın alǵan puqaralar emlenip atırǵan palatalarǵa kirip, olardan xabar aldı, shańaraq aǵzaları menen sáwbetlesti.
Prezidentimiz juwapkerlerge jábirlengenlerge zárúr barlıq medicinalıq járdem kórsetiliwin qatań qadaǵalawǵa alıw boyınsha tapsırma berdi. Baxıtsız hádiyse aqıbetinde qaytıs bolǵanlardıń shańaraq aǵzalarına kewil aytıp, olarǵa materiallıq járdem kórsetiw zárúrligin atap ótti.
Juwapkerlerge júz bergen waqıyanıń sebeplerin puqta úyreniw, nızam ústinligin támiyinlew, keleshekte bunday jaǵdaylardıń aldın alıw hám órt qáwipsizligi ústinen qadaǵalaw jumısların kúsheytiw wazıypası qoyıldı.
Mámleketimiz basshısı Gulistan qalasınıń jámiyetlik transport infrastrukturasın jetilistiriw maqsetinde alıp kelingen zamanagóy avtobuslardıń prezentaciyası menen de tanıstı.
Gúlistan qalasındaǵı ishki jollar boylap qatnawlardı ámelge asırıw maqsetinde 52 avtobus alıp kelindi. Olar “Evro-5” standartınıń talaplarına tolıq juwap beredi hám tábiyǵıy qısılǵan gazde háreketlenedi.
Hár biri 65 jolawshını qolaylı sharayatlarda mánziline jetkeriwge mólsherlengen bul avtobuslar tómen pollı bolıp, mayıplıǵı bolǵan shaxslardıń háreketleniwi ushın arnawlı pandus úskeneleri hám óz aldına orınlıqlar menen úskenelengen. Jol haqı tólemlerin elektron tárizde de ámelge asırıw ushın “ATTO” sisteması ornatılǵan.
Xalıqtıń jámiyetlik transportqa bolǵan talabın esapqa alıp, avtobuslardıń háreketi Gúlistan qalasınıń 23 máhállesin tolıq qamtıp alıwshı jámi 7 qala ishki jónelisinde brutto-shártnama tiykarında háreketlenedi.
Nátiyjede avtobuslardıń háreket intervalı aldınǵıǵa salıstırǵanda 2 esege qısqarıp, kúnine 29 mıń xalıqqa qolaylı, qáwipsiz hám arzan transport xızmetleri kórsetiliwi támiyinlenedi.
Jáne bir tárepi: bul qatnawlar arqalı jılına 38 milliard sumnan aslam transport xızmetleri kórsetiledi, 120 jumıs ornı jaratıladı.
Mámleketimiz basshısı juwapkerlerge elimiz qalalarınıń jámiyetlik transport parklerin usınday zamanagóy avtobuslar menen tolıqtırıw jumısların izbe-iz dawam ettiriw, puqaralarǵa sapalı xızmet kórsetiw boyınsha kórsetpeler berdi.
Bul jerde keleshekte 11 metrli, uzaq aralıqqa mólsherlengen jáne 30 avtobustı alıp keliw rejesi haqqında maǵlıwmat berildi. Bul joybar ámelge asırılsa, qosımsha jáne 150 den aslam jumıs ornı jaratıladı.
Bunnan soń, xalıq deputatları Sırdárya wálayatı Keńesiniń gezeksiz sessiyası bolıp ótti. Onda Prezident Shavkat Mirziyoev qatnastı.
Májilis aldınan mámleketimiz basshısı “Insan qádiri ushın” degen iygilikli princip tiykarında ámelge asırılıp atırǵan reformalardıń nátiyjesi sıpatında Sırdárya wálayatındaǵı úlken ózgerislerdi ayrıqsha atap ótti.
– Burın tiykarınan awıl xojalıǵına baylanıslı bolıp qalǵan bul jerde sońǵı jılları sanaat, servis, turizm joqtan bar boldı. Biznes ortalıǵı pútkilley ózgerdi, aldınǵı isbilermenler qatlamı qáliplesti, -dedi mámleketimiz basshısı.
Segiz jılda Sırdárya wálayatına 4 milliard dollar investiciya kirgizildi. Usı dáwir ishinde 187 iri quwatlıq iske qosılıp, 120 mıń jumıs ornı jaratıldı. 50 ge shamalas jańa túrdegi ónimlerdi islep shıǵarıw jolǵa qoyıldı. Nátiyjede sanaat kólemi 4 trillion sumnan 25 trillion sumǵa jetti.
Burın dotaciya alǵan Gúlistan, Yangier qalaları, Boyovut, Mırzabad, Sayxunabad, Sırdárya hám Xovos rayonları búgin óz qárejetin ózi qaplaw dárejesine jetkeni atap ótildi.
Sırdárya rayonında kelesi jılı qıtaylı sherikler menen 122 million dollarlıq avtomobil qurılısı joybarı iske qosıladı. Jaqında Qazaqstan menen birgelikte Sırdárya rayonında Oraylıq Aziya xalıqaralıq sanaat kooperaciyası orayına start berildi. Bul oray aymaǵında bahası 300 million dollarlıq 14 sanaat kárxanası kelesi jıldıń birinshi shereginiń aqırına shekem jumıs baslawı, 2026-jılı jáne 720 million dollarlıq 40 jańa joybar jaylastırılıwı belgilendi.
Mámleketimiz basshısı Sırdáryada baqsha, mektep, emlewxana orınların kóbeytiw, elektr, suw, kanalizaciya hám jollardı jaqsılaw baǵdarında ámelge asırılǵan jumıslarǵa da toqtap ótti. Tek ǵana usı jıldıń ózinde xalıqtıń turmıs sharayatın jaqsılaw ushın 100 million dollar resurs qaratıldı. Nátiyjede 47 mektep, 45 balalar baqshası, 31 medicina mákemesi, 5 sport hám mádeniyat orayı túp-tiykarınan ońlanıp, zamanagóy inventarlar menen támiyinlendi. Bul jumıslar izbe-iz dawam ettirilip, kelesi jılı jáne 100 million dollar ajıratılatuǵını járiyalandı.
Sessiyada shólkemlestiriw máselesi de kórildi. Prezidentimiz hákim wazıypasın atqarıp atırǵan Erkin Turdimovtıń kandidaturasın Sırdárya wálayatınıń hákimi lawazımına alǵa qoydı.
Wálayat belsendileriniń pikir-usınısları tıńlanıp, talaban dawısqa qoyıldı. Dawıs beriw nátiyjelerine bola, Erkin Turdimov Sırdárya wálayatı hákimi lawazımına tastıyıqlandı.
Mámleketimiz basshısı jańa hákim aldına Sırdáryanı rawajlandırıw boyınsha anıq wazıypalar qoydı. Sonıń ishinde, kelesi jıllar dawamında wálayatqa jámi 3 milliard dollar investiciya kirgiziw, eksport kólemin 500 million dollarǵa jetkeriw, 185 mıń xalıqtı jumıs penen támiyinlew boyınsha tınımsız islew zárúrligi atap ótildi.
Májiliste wálayatta sanaat, servis, awıl xojalıǵın bunnan bılay da rawajlandırıw, infrastrukturanı jaqsılaw máseleleri kórip shıǵıldı.
Keyingi jılları qıtaylı investorlar menen birgelikte ulıwma bahası 500 million dollar bolǵan 31 kárxana iske qosılıp, 5 mıń puqara joqarı dáramatlı jumıs orınları menen támiyinlendi. Qıtaylı sherikler menen jáne 700 million dollarlıq 40 joybar boyınsha jumıslar jedel dawam etpekte.
Yangier, Gúlistan hám Shirin qalaları, Sırdárya, Boyovut, Gúlistan, Mırzabad, Aqaltın, Xovos rayonları esabınan “Sırdárya” erkin ekonomikalıq zonasınıń aymaǵı 1080 gektarǵa shekem keńeytildi. Wálayat hám rayon hákimlerine sanaat zonasına qosıp berilgen maydanlarda keminde 4 milliard dollarlıq joybarlardı baslaw áhmiyetli ekenligi kórsetip ótildi.
Onıń ushın joybarlardıń nátiyjeliligin puqta esaplap, investorlarǵa tanıstırıw maqsetinde Sırdárya, Boyovut, Gúlistan, Mırzabad, Aqaltın, Xovos rayonları, sonday-aq, Yangier, Gúlistan hám Shirin qalalarınıń hákimlerinen ibarat delegaciyanı Qıtayǵa jiberiw tapsırıldı.
Qurılıs materialları boyınsha Czyansu, Shandun hám Guandun, ximiya sanaatı boyınsha Tyanczin, elektrotexnika boyınsha Fuczyan hám Gonkong, jeńil sanaatta Shandun hám Sinczyan, farmacevtika tarawında Shanxay hám Czyansi aymaqları menen tikkeley birge islesiwdi ornatıw wazıypası qoyıldı.
Sonday-aq, Gúlistan qalasında keminde 5 mıń jumıs ornına iye “Ózbekstan – Shanxay birge islesiw shólkemi” sawda hám sanaat zonasınıń shólkemlestiriletuǵını belgilendi. Bul jerdegi obektler tayar joybar sıpatında isbilermenlerge sanaat ipotekası yamasa lizing tiykarında usınıs etiledi.
Tashkent qalasındaǵı sanaat kárxanaların basqıshpa-basqısh paytaxttan sırtqa kóshiriw procesinde “Sırdárya” erkin ekonomikalıq zonasındaǵı bos jerler bar quwatlıqlardı jaylastırıw ushın úlken imkaniyat ekeni atap ótildi.
Sonlıqtan, paytaxttan óz kárxanasın Sırdáryaǵa kóshiriw tileginde bolǵan isbilermenlerge sanaat zonasındaǵı jerler ápiwayılastırılǵan tártipte, shegirme menen beriledi, olarǵa 10 milliard sumǵa shekem jeńilletilgen kredit ajıratıladı, shiyki zattı temir jol arqalı tasıwda arzanlastırılǵan tarifler qollanıladı.
Májiliste isbilermenlik hám servis infrastrukturasın rawajlandırıw máseleleri de kórip shıǵıldı.
2026-jılı wálayattıń infrastrukturasın jaqsılawǵa 1,5 trillion sum, isbilermenlik joybarları ushın 10 trillion sum resurs ajıratıw rejelestirilgen. Sonıń 753 milliard sumı birinshi márte Sırdárya wálayatı hám rayon byudjetlerine máhállelerdiń sharayatın jaqsılawǵa qaratıladı.
Prezidentimiz xalıqtıń bántligin támiyinlew hám kámbaǵallıqtı qısqartıw boyınsha jańasha qatnaslar, nátiyjeli sheshimlerdi engiziw ushın bárqulla izleniw, úyreniw hám tájiriybe arttırıw oǵada áhmiyetli ekenin atap ótti.
Usı maqsette 11 rayon hákiminiń birinshi orınbasarın Pekindegi Kámbaǵallıqqa qarsı gúresiw boyınsha xalıqaralıq orayda ámeliyat ótewin shólkemlestiriw, sırdáryalı 50 jastı Pekin qalasında avtomobillerge texnikalıq xızmet kórsetiw boyınsha kurslarda oqıtıw tapsırıldı.
Sonday-aq, Gúlistan universiteti janında Qıtaydıń “Lu Ban ustaxanası” baǵdarlaması sheńberinde kásip-ónerge oqıtıw orayın, Sırdárya rayonındaǵı medicina texnikumı negizinde bolsa Qıtay menen birgelikte farmacevtika texnologiyaları baǵdarında joqarı oqıw ornın shólkemlestiriw boyınsha kórsetpeler berildi.
Awıl xojalıǵın rawajlandırıw máseleleri de hár tárepleme kórip shıǵıldı.
Egislik jerlerde suw támiynatın jaqsılaw maqsetinde kelesi jılı Boyovut rayonında sıyımlılıǵı 100 million kub metr bolǵan “Sultonhovuz” suw saqlaǵıshınıń qurılısı baslanadı. Bul arqalı Boyovut, Gúlistan, Sayxunabad, Sırdárya hám Mırzaabad rayonlarındaǵı 110 mıń gektarda jılına eki márte ónim alıw imkaniyatı jaratıladı.
Májiliste xalıq hám isbilermenlerdiń turmısın jeńillestiriwge qaratılǵan baslamalarǵa da ayrıqsha toqtap ótildi.
A-373 jolınıń Sayxunabad hám Gúlistan rayonlarınan ótetuǵın 37 kilometr bólegin altı polosalı etip rekonstrukciyalaw jumısların baslaw tapsırıldı. Boyovut, Gúlistan, Xovos, Mırzabad, Sırdárya hám Sayxunabadtıń 18 máhállesindegi 67 kilometr joldı cement-beton qaplamaǵa ótkeriw rejelestirilgen.
Eki kún aldın Gúlistan qalası Taraqqiyot máhállesindegi buyım bazarı aymaǵında jaylasqan ulıwma awqatlanıw shaqapshalarınan birinde gaz ballonı jarılıwı nátiyjesinde 29 puqara jaraqatlandı.
Tilekke qarsı, bul baxıtsız hádiysede qurbanlar da bar. Prezidentimiz qaytıs bolǵanlardıń shańaraq aǵzalarına tereń qayǵırıw menen kewil bildirdi. Úsh kún múddette qurbanlardıń shańaraǵına 100 million sumnan materiallıq járdem ajıratıw tapsırıldı.
– Búgin sizler menen wálayattı bunnan bılay da rawajlandırıw, xalıq hám isbilermenlerdiń awırın jeńil, uzaǵın jaqın etiw boyınsha úlken-úlken reje hám maqsetlerdi belgilep aldıq. Sırdáryalılardıń dóretiwshilik, intakerlik hám pidayılıq pazıyletlerine súyenip, bul sheklerge, álbette, erisemiz, – dedi Prezidentimiz májilis juwmaǵında.
Sessiya dawamında juwapkerlerdiń esabatları, qatnasıwshılardıń pikir-usınısları tıńlandı.
Sonıń menen mámleketimiz basshısınıń Sırdárya wálayatına saparı juwmaqlandı.

ÓzA