Samarqand mámleketlik veterinariya medicinası, sharwashılıq hám biotexnologiyalar universiteti Nókis filialında 8-dekabr — Ózbekstan Respublikası Konstituciyası qabıl etilgen kún hám Bas nızamımızdıń 33 jıllıǵına baǵıshlanǵan saltanatlı ilaj bolıp ótti.

Ilajda Ózbekstan Kásiplik awqamları Federaciyası Qaraqalpaqstan Keńesiniń baslıǵı, Qaraqalpaqstan Respublikası Joqarǵı Keńesiniń deputatı U.Jalmenov, Qaraqalpaqstan Respublikası sudı sudyasınıń aǵa járdemshisi I.Mustafaev, filial basshıları hám student-jaslar qatnastı.
Ilaj Ózbekstan hám Qaraqalpaqstan Respublikalarınıń mámleketlik gimnleri menen baslandı.
Ilajdı filial direktorı A.Esimbetov alıp bardı.
Atap ótilgenindey, Konstituciya mámlekettiń siyasiy-huqıqıy rawajlanıwında ayrıqsha orın iyelep, mámleket hám puqaralar arasındaǵı juwapkershilikli qatnasıqlardıń bekkem normativlik tiykarın belgilep beredi. Bas nızam mámlekettiń huqıqıy kórinisin belgilep beretuǵın tiykarǵı normativlik hújjet sıpatında ulıwmaxalıqlıq tilekleslik, insanıylıq principleri hám nızam ústinligin támiyinlewde áhmiyetli orın iyeleydi.
Nızam ústinligin támiyinlew mámleketlik basqarıwdıń tiykarǵı baǵdarlarınan biri bolıp, búgingi nátiyjeler ámelge asırılıp atırǵan reformalardıń nátiyjeliligin ayqın kórsetpekte.
Ilaj dawamında student-jaslar tárepinen huqıqıy bilimlerdi jáne de tereńlestiriw, Konstituciyada belgilengen normalardı turmıs filosofiyası sıpatında qabıl etiw zárúrligi boyınsha pikirler bildirildi.

Qaraqalpaqstan xabar agentligi